తన విలక్షణ నటనతో గుర్తింపు తెచ్చుకున్న నటుడు బాబీ సింహా. ఎలాంటి పాత్రలో అయినా సింహా అద్భుతంగా నటించగలడు. నెగిటివ్ రోల్స్ అయితే తన విశ్వరూపమే ప్రదర్శిస్తాడు సింహా. 2014లో వచ్చిన జిగర్తాండ చిత్రం సింహా క్రేజ్ ని అమాంతం పెంచేసింది.

ఆ చిత్రంలో నెగిటివ్ షేడ్స్ లో సింహా నటన అద్భుతం అనే చెప్పాలి. ఆ చిత్రాన్నే తెలుగులో గద్దలకొండ గణేష్ గా రీమేక్ చేశారు. ఇదిలా ఉండగా సింహా నుంచి తాజాగా వస్తున్న చిత్రం 'వసంత కోకిల'. తెలుగు, తమిళ, కన్నడలో రిలీజ్ కానుంది. తాజాగా ఈ చిత్ర టీజర్ ని రిలీజ్ చేశారు.

ఉత్కంఠ కలిగించేలా ఉన్న టీజర్ సినిమాపై క్యూరియాసిటీ పెంచే విధంగా ఉంది. ఈ చిత్రంలో సింహా, యంగ్ బ్యూటీ కాశ్మీరా పర్దేషి జంటగా నటిస్తున్నారు. టీజర్ ఓపెనింగ్ షాట్ లో వీరిద్దరి మధ్య అండర్ వాటర్ రొమాన్స్ చూపించారు.

కన్ఫ్యూషన్, పెయిన్, ఆవేశం ఇలా అన్ని షేడ్స్ ఉన్న వ్యక్తిగా సింహా ఈ చిత్రంలో కనిపిస్తున్నాడు. ఏదో మిస్టీరియస్ సబ్జెక్టుతో ఈ చిత్రం తెరకెక్కుతున్నట్లు టీజర్ ద్వారా అర్థం అయింది. రమణన్ పురుషోత్తమ దర్శత్వంలో ఈ చిత్రం తెరకెక్కుతుండగా.. ఎస్ఆర్ టి ఎంటర్టైన్మెంట్స్ బ్యానర్ పై రజిని తాళ్లూరి నిర్మిస్తున్నారు. రాజేష్ మురుగేశన్ ఈ చిత్రానికి సంగీత దర్శకుడు.