ఈ ఏడాది `ఎఫ్ 2`, `గ‌ద్ద‌ల‌కొండ గ‌ణేశ్‌`తో రెండు వ‌రుస విజ‌యాల‌ను చూశాడు మెగా ప్రిన్స్ వ‌రుణ్ తేజ్‌. ఈ నేప‌థ్యంలో... వ‌రుణ్ నెక్ట్స్ ప్రాజెక్ట్‌పై స‌ర్వ‌త్రా ఆస‌క్తి నెల‌కొంది. డెబ్యూ డైరెక్ట‌ర్ కిర‌ణ్ కొర్ర‌పాటి కాంబినేష‌న్‌లో త‌న త‌దుప‌రి చిత్రాన్ని చేయ‌బోతున్నాడు వ‌రుణ్‌. స్పోర్ట్స్ డ్రామాగా తెర‌కెక్క‌నున్న ఈ సినిమాలో వ‌రుణ్ బాక్స‌ర్‌గా న‌టించ‌బోతున్నాడు. ఇప్ప‌టికే ప్ర‌త్యేక శిక్ష‌ణ కూడా తీసుకున్నాడ‌ని స‌మాచారం. కాగా, ఈ సినిమాకి సంబంధించిన పూజా కార్య‌క్ర‌మాల‌ను అక్టోబ‌ర్ 10న జ‌రిపి... 2020 ఆరంభంలో రెగ్యుల‌ర్ షూటింగ్ ప్రారంభిస్తార‌ని తెలిసింది.

అల్లు అర‌వింద్ స‌మ‌ర్ప‌ణ‌లో అల్లు బాబీ, సిద్ధు ముద్దా సంయుక్తంగా నిర్మించ‌నున్న ఈ సినిమాకి యువ సంగీత సంచ‌ల‌నం ఎస్‌.ఎస్‌. థ‌మ‌న్ బాణీలు అందించ‌నున్నాడు. జార్జ్ సి. విలియ‌మ్స్ ఛాయాగ్ర‌హ‌ణం అందించ‌నున్నాడు. త్వ‌ర‌లోనే ఈ క్రేజీ ప్రాజెక్ట్‌కి సంబంధించిన పూర్తివివ‌రాలు అధికారికంగా వెల్ల‌డి కానున్నాయి.

ఇదిలా ఉంటే, `తొలిప్రేమ‌` ద‌ర్శ‌కుడు వెంకీ అట్లూరితోనూ వ‌రుణ్ మ‌రో సినిమా చేయ‌బోతున్నాడు. `దిల్‌` రాజు నిర్మాణంలో తెర‌కెక్కనున్న‌ ఈ రొమాంటిక్ ఎంట‌ర్‌టైన‌ర్‌... 2020 ద్వితీయార్ధంలో ప‌ట్టాలెక్కుతుంద‌ని సమాచారం. మ‌రి.. వరుస విజ‌యాల‌తో దూకుడు మీదున్న వ‌రుణ్‌.. రాబోయే చిత్రాల‌తోనూ ఆ ప‌రంప‌ర‌ని కొన‌సాగిస్తాడేమో చూడాలి.