మరో మెగా హీరోకు కరోనా...
- IndiaGlitz, [Tuesday,December 29 2020]
తాను కరోనా బారిన పడ్డానంటూ మంగళవారం ఉదయం మెగా పవర్ స్టార్హీ రామ్ చరణ్ ప్రకటించిన విషయం తెలిసిందే. చెర్రీ ప్రకటించిన కొన్ని గంటల్లోనే తాను కూడా కరోనా బారిన పడినట్టు మరో మెగా హీరో ప్రకటించాడు. మెగా ప్రిన్స్ వరుణ్ తేజ్‌కు కూడా కరోనా పాజిటివ్‌గా నిర్దారణ అయింది. ఈ విషయాన్ని వరుణ్ సోషల్ మీడియా వేదికగా తెలియజేశాడు. తనకు స్వల్ప లక్షణాలుండటంతో కరోనా పరీక్ష చేయించుకోగా పాజిటివ్‌గా నిర్దారణ అయిందని ప్రస్తుతం తాను హోం క్వారంటైన్‌లో ఉన్నానని వరుణ్ తేజ్ వెల్లడించాడు.
‘‘ఈ రోజు ఉదయం నాకు కోవిడ్ పాజిటివ్‌గా నిర్ధారణ అయింది. కోవిడ్ 19కు సంబంధించిన స్వల్ప లక్షణాలున్నాయి. నేను ప్రస్తుతం హోం క్వారంటైన్‌లో ఉన్నాను. అవసరమైన జాగ్రత్తలన్నీ తీసుకుంటున్నాను. నేను త్వరలోనే తిరిగి వస్తాను. మీ అందరి ప్రేమకు ధన్యవాదాలు’’ అని వరుణ్ తేజ్ ట్వీట్ చేశాడు. ప్రస్తుతం వరుణ్ తేజ్ బాక్సింగ్ నేపథ్యంలో తెరకెక్కుతున్న ఓ సినిమాలో నటిస్తున్నాడు. అలాగే విక్టరీ వెంకటేశ్‌తో కలిసి ఎఫ్ 3 చిత్రంలో నటిస్తున్నాడు. ఈ చిత్రం ప్రస్తుతం షూటింగ్ జరుపుకుంటోంది.