ఒకప్పుడు అనుభవం లేని ద‌ర్శ‌కుడితో సినిమా చేయాలంటే ఆలోచించేవారు హీరోలు. కాని ఇప్పుడు...అనుభవం కాదు దర్శకుల ఆలోచనలకి ఫిదా అయిపోతున్నారు యంగ్ హీరోలు. దీనికి కారణం లేకపోలేదు.. గత కొంత కాలంగా కొత్త దర్శకులు.. విభిన్నమైన కథలు, కథనాలు ఉన్న‌ చిన్న సినిమాలతో పెద్ద విజయాలు అందుకుంటున్నారు. అలా త‌న‌ మొదటి సినిమాతోనే తన‌లోని ప్ర‌తిభ‌ని పరిశ్రమకి తెలియజేసిన డైరెక్టర్ సంకల్ప్ రెడ్డి.

జలాంతర్గామి యుద్ధం నేపథ్యంలో ఈ దర్శకుడు తెరకెక్కించిన ఘాజీ` మూవీ ఎంత పెద్ద విజయాన్ని చవి చూసిందో ప్ర‌త్యేకంగా చెప్ప‌న‌క్క‌ర్లేదు. ఈ యువ ద‌ర్శ‌కుడు తన తదుపరి చిత్రాన్ని వరుణ్ తేజ్ తో చేయబోతున్నట్టు ఇప్పటికే ప్రకటించేశారు. అంతరిక్షం నేపథ్యంగా సాగే ఈ చిత్రాన్ని కేవలం 25కోట్ల రూపాయలతో తెరకెక్కిస్తున్నారు సంకల్ప్ రెడ్డి. అంతేకాదు... అంతరిక్షం నేపథ్యంగా సినిమా రావడం కూడా తెలుగులో ఇదే ప్రధమం. ప్రస్తుతం ప్రీ-ప్రొడక్షన్ పనులను జరుపుకుంటున్న ఈ చిత్రాన్ని మే నెల నుంచి సెట్స్ పైకి తీసుకువెళ్ళడానికి దర్శకుడు ప్లాన్ చేస్తున్నారు. త్వ‌ర‌లోనే దీనికి సంబంధించిన అధికారిక ప్ర‌క‌ట‌న వెలువ‌డుతుంది.