యు.కె. నేప‌థ్యంలో వరుణ్ చిత్రం
- IndiaGlitz, [Tuesday,March 20 2018]
‘ఫిదా’, ‘తొలిప్రేమ’ సినిమాలతో బ్యాక్ టు బ్యాక్ విజయాలను తన ఖాతాలో వేసుకున్నారు మెగా ప్రిన్స్ వరుణ్ తేజ్. ఇప్పుడు ఇదే జోష్ తో వరుస సినిమాలను ఓకే చేసేస్తున్నారు. ఇప్పటికే ‘ఘాజీ’ దర్శకుడు సంకల్ప్ రెడ్డితో ఓ సినిమా చేయడానికి గ్రీన్ సిగ్నల్ ఇచ్చేసారు వరుణ్. తాజాగా దర్శకుడు సాగర్ చంద్ర సినిమాను కూడా ఓకే చేసేశారు ఈ మెగా హీరో. ‘అయ్యారే’, ‘అప్పట్లో ఒకడుండేవాడు’ వంటి సినిమాలతో ద‌ర్శ‌కుడిగా మంచి గుర్తింపు తెచ్చుకున్నారు సాగర్. 14 రీల్స్ ప్ల‌స్‌ పతాకంపై రామ్, గోపి ఆచంటలు ఈ మూవీని నిర్మిస్తున్నారు.
ఈ చిత్రంలో కాలేజీ స్టూడెంట్‌గా వరుణ్ కనిపించనున్నారని సమాచారం. ప్రేమకథా చిత్రంగా తెరకెక్కుతున్న ఈ సినిమాలో వరుణ్ రెండు భిన్నమైన పాత్రల్లో కనిపించనున్నారని తెలిసింది. ఇటీవల వరుణ్ నటించిన ‘ఫిదా’, ‘తొలిప్రేమ’ సినిమాల మాదిరే ఈ సినిమా కూడా విదేశాల నేపథ్యంతో తెర‌కెక్క‌నుంద‌ని సమాచారం. యు.కె.నేప‌థ్యంలో సాగే ఈ సినిమా ఎక్కువ భాగం అక్క‌డే చిత్రీక‌ర‌ణ జ‌రుపుకుంటుంద‌ని టాలీవుడ్ వ‌ర్గాలు పేర్కొంటున్నాయి. ఈ చిత్రానికి సంబంధించిన పూర్తి వివ‌రాలు త్వ‌ర‌లోనే వెల్ల‌డికానున్నాయి.