అనౌన్స్ కాకముందే..వరుణ్ సినిమాపై ఆసక్తి
- IndiaGlitz, [Friday,August 11 2017]
ఫిదా సినిమాతో సాలిడ్ హిట్‌ని త‌న ఖాతాలో వేసుకున్నాడు మెగా ప్రిన్స్ వరుణ్ తేజ్‌. కంచె చిత్రం న‌టుడిగా గుర్తింపుని తీసుకువ‌స్తే.. ఫిదా సినిమా వరుణ్ కోరుకుంటున్న క‌మర్షియ‌ల్ విజ‌యాన్ని ఇచ్చింది. దీంతో అత‌ని త‌దుప‌రి చిత్రాల‌పై ఇండ‌స్ట్రీ వ‌ర్గాల‌లో ఆసక్తి పెరిగింది. ముఖ్యంగా వరుణ్ 7వ చిత్రంపై అనౌన్స్ కాకముందే ఆసక్తి పెరిగింది. ఫిదా వరుణ్ న‌టించిన 5వ చిత్రం కాగా.. ఆరో సినిమా కొత్త ద‌ర్శ‌కుడు వెంకీ అట్లూరి కాంబినేష‌న్‌లో తెర‌కెక్కుతోంది.
7వ సినిమా విష‌యానికి వ‌స్తే.. మెగా ఫ్యామిలీలో చిరంజీవి, ప‌వ‌న్ క‌ళ్యాణ్‌, రామ్‌చ‌ర‌ణ్‌కి ఏడో చిత్రాలు క‌లిసొచ్చాయి. వరుణ్ పెద‌నాన్న చిరంజీవికి ఏడో చిత్రం పునాది రాళ్లు న‌టుడిగా మంచి గుర్తింపుని తీసుకురావ‌డ‌మే కాకుండా విజ‌యం సాధించ‌గా.. ప‌వ‌న్ ఏడో చిత్రం ఖుషి బ్లాక్‌బ‌స్ట‌ర్ హిట్ అయింది. ఇక చ‌ర‌ణ్ ఏడో సినిమా ఎవ‌డు కూడా క‌మ‌ర్షియ‌ల్‌గా మంచి హిట్ అయింది. ఈ నేప‌థ్యంలో పెద‌నాన్న, బాబాయ్‌, అన్నల త‌ర‌హాలో వ‌రుణ్‌తేజ్‌కి కూడా 7వ చిత్రం ఏ మేర‌కు క‌లిసొస్తుందో అన్నది ఆస‌క్తిక‌రంగా మారింది.