இன்றைய சூழ்நிலையில் 'மைக்கேல்' என்றால் அனைவருக்கும் 'பிகில் பட விஜய் கேரக்டர் தான் ஞாபகம் வரும். ஆனால் 'பர்மா' என்ற படத்தில் நடித்த நடிகர் மைக்கேல் தற்போது 'என் 4' என்ற படத்தில் நாயகனாக நடித்து வருகிறார். லோகேஷ் குமார் என்பவர் இந்த படத்தை இயக்கவுள்ளார். இவர் 'My Son is Gay' என்ற குறும்படத்தை இயக்கி பிரபலமானவர் என்பது குறிப்பிடத்தக்கது.

இந்த படத்தில் நாயகியாக நடிக்க பிரபல டிவி சீரியல் நடிகை வாணிபோஜன் ஒப்பந்தம் செய்யப்பட்டிருந்தார். ஆனால் வாணிபோஜனால் படக்குழுவினர் கேட்கும் தேதிகளை கொடுக்க முடியாததால் இந்த படத்தில் இருந்து விலகிவிட்டார். எனவே தற்போது அவருக்கு பதிலாக சரண்யா என்ற நடிகை ஒப்பந்தமாகியுள்ளார். இவரும் தொலைக்காட்சி தொடர்களில் நடித்து வரும் நடிகை தான். இவர் முன்னணி தொலைக்காட்சி ஒன்றில் ஒளிபரப்பான 'நெஞ்சம் மறப்பதில்லை' சீரியலில் நடித்தவர் என்பது குறிப்பிடத்தக்கது.

இந்த படத்தில் அனுபமா குமார், அபிஷேக், வடிவுக்கரசி உள்பட பலர் நடிக்கவுள்ளனர். இந்த படத்தின் தொழில்நுட்ப கலைஞர்கள் தேர்வு செய்யப்பட்டு வருவதாகவும், இம்மாத இறுதியில் இந்த படத்தின் படப்பிடிப்பு தொடங்கவுள்ளதாகவும் தெரிகிறது.