దేశ ప్రజలకు సుఖవంతమైన, వేగవంతమైన ప్రయాణాన్ని అందించేందుకు గాను రైల్వే శాఖ వందే భారత్ ఎక్స్‌ప్రెస్ తీసుకొచ్చిన సంగతి తెలిసిందే. ఇప్పటికే భారతదేశంలో 13 వందే భారత్ ఎక్స్‌ప్రెస్‌లు అందుబాటులోకి రాగా.. రానున్న కాలంలో ఈ సంఖ్య మరింత పెరగనుంది. ప్రస్తుతానికి సీట్లలతో కూడిన వందే భారత్‌లు పరుగులు తీస్తుండగా.. రానున్న రోజుల్లో బెర్త్‌లతో కూడిన రైళ్లను ప్రవేశపెట్టేందుకు రైల్వేశాఖ తీవ్రంగా ప్రయత్నిస్తోంది. కాగా.. దేశంలోని పలు చోట్ల వందే భారత్ ఎక్స్‌ప్రెస్‌ రైళ్లు ఢీకొని మూగజీవాలు ప్రాణాలు కోల్పోతోన్న సంగతి తెలిసిందే. రైల్వే శాఖ, పోలీసులు తీవ్రంగా ప్రయత్నాలు చేస్తున్నప్పటికీ.. మూగజీవాలు బలైపోతున్నాయి.

అటుగా వెళ్తున్న మనిషిపై పడ్డ జింక:

తాజాగా రాజస్థాన్‌లో వందే భారత్ రైలు ఢీకొని ఓ జింక మృతిచెందింది. అంతేకాదు.. అది ఎగిరి సమీపంలో వున్న మరో వ్యక్తిపై పడటంతో అతను కూడా ప్రాణాలు కోల్పోయాడు. వివరాల్లోకి వెళితే.. రాజస్థాన్‌ రాష్ట్రం అల్వార్‌లోని కలిమోరి రైల్వే లెవల్ క్రాసింగ్ వద్ద ఈ ఘటన చోటు చేసుకుంది. మృతుడిని శివదయాల్‌గా గుర్తించారు. ఢిల్లీ నుంచి అజ్మీర్ వెళ్తున్న వందే భారత్ ఎక్స్‌ప్రెస్ కాణంగా ఈ ఘటన జరిగింది. ప్రమాదం కారణంగా ఈ రైలును కొద్దిసేపు నిలిపివేశారు. శివదయాళ్ రిటైర్డ్ రైల్వే ఉద్యోగి. ఇతనికి ఇద్దరు కుమారులు వున్నారు. అత్యంత వేగంగా రైలు జింకను ఢీకొనడం.. అది అంతే వేగంగా శివదయాళ్‌పై పడటంతో అతను ప్రాణాలు కోల్పోయినట్లుగా పోలీసులు ప్రాథమిక నిర్ధారణకు వచ్చారు. స్థానికంగా ఈ ఘటన సంచలనం సృష్టిస్తోంది.

త్వరలో బెంగళూరు- సికింద్రాబాద్ మధ్య మూడో వందే భారత్ :

ఇక మన తెలుగు రాష్ట్రాల విషయానికి వస్తే.. సికింద్రాబాద్-విశాఖపట్నం, సికింద్రాబాద్-తిరుపతి మధ్య వందే భారత్ ఎక్స్‌ప్రెస్‌లు పరుగులు పెడుతున్నాయి. ఈ క్రమంలో తెలుగు ప్రజలకు రైల్వే శాఖ మరో శుభవార్త చెప్పింది. త్వరలో సికింద్రాబాద్ నుంచి బెంగళూరుకు వందే భారత్ నడిపే అవకాశాలు కనిపిస్తున్నాయి. ఇటీవల సికింద్రాబాద్-తిరుపతి వందే భారత్ ఎక్స్‌ప్రెస్ ప్రారంభోత్సవం సందర్భంగా తెలంగాణకు వచ్చిన ప్రధాని నరేంద్ర మోడీ ఈ విషయంపై నేతలకు ఓ సంకేతం ఇచ్చినట్లుగా తెలుస్తోంది. అదే కనుక నిజమైతే బెంగళూరు, హైదరాబాద్ నగరాల మధ్య ప్రయాణించే వారు మరింత వేగంగా గమ్యస్థానాలను చేరవచ్చు. అంతేకాదు.. తెలుగు ప్రజలకు మూడు వందే భారత్‌లు ఇచ్చినట్లుగా అవుతుంది.