சுந்தர் சியின் 'கலகலப்பு 2' படத்தில் பிக்பாஸ் பிரபலம்
- IndiaGlitz, [Thursday,October 05 2017]
பிக்பாஸ் நிகழ்ச்சியில் கலந்து கொண்டவர்கள் அனைவருக்குமே இந்த நிகழ்ச்சி நல்ல விளம்பரத்தை தந்துள்ளது. யார் என்றே தெரியாமல் இருந்த ஆரவ் இன்று தமிழகத்தின் டாக் ஆப் தி பெர்சன் ஆகிவிட்டார். அதேபோல் ஒவியாவுக்கு அவரே எதிர்பார்க்காத அளவுக்கு புகழும் ரசிகர்களும் கிடைத்துள்ளனர். பிக்பாஸ் நிகழ்ச்சியில் கலந்து கொண்ட அனைவருக்குமே நல்ல எதிர்காலம் இருப்பதாகத்தான் தெரிகிறது.
இந்த நிலையில் பிக்பாஸ் பங்கேற்பாளர்களில் ஒருவரான நடிகர் வையாபுரி, சுந்தர் சி இயக்கவுள்ள 'கலகலப்பு 2' படத்தில் ஒரு முக்கிய கேரக்டரில் நடிக்கவுள்ளார். இந்த தகவலை அவரே உறுதி செய்தது மட்டுமின்றி சுந்தர் சி இயக்கத்தில் 19 வருடங்களுக்கு பின்னர் மீண்டும் நடிப்பதாக கூறினார். இதற்கு முன்னர் அஜித் நடிப்பில் சுந்தர் சி இயக்கிய 'உன்னைத்தேடி' படத்தில் நடித்துள்ளதாக அவர் நினைவு கூறினார்.
மேலும் மிஷ்கின் இயக்கும் அடுத்த படத்தில் நடிப்பது குறித்த பேச்சுவார்த்தை நடந்து வருவதாகவும் மிக விரைவில் மிஷ்கினை சந்திக்கவுள்ளதாகவும் வையாபுரி கூறியுள்ளார். பிக்பாஸ் நிகழ்ச்சியில் இருந்து வெளியேறியதும் தன்னை பிரபு தன்னுடைய வீட்டுக்கு அழைத்து வாழ்த்தியதாகவும், அவருடைய ஒட்டுமொத்த குடும்பமும் பிக்பாஸ் ரசிகர்கள் என்பதை அறிந்து தான் மிகுந்த மகிழ்ச்சி அடைந்ததாகவும் வையாபுரி கூறியுள்ளார்.