మెగాస్టార్‌తో పాటు మహేష్, ఎన్టీఆర్‌లను బీట్ చేసిన వైష్ణవ్?
- IndiaGlitz, [Monday,February 15 2021]
మెగా హీరో వైష్ణవ్ తేజ్ తొలి సినిమాతోనే అదరగొడుతున్నాడు. ఈ నెల 12న విడుదలైన ఈ సినిమా తొలిరోజు నుంచే వసూళ్ల ‘ఉప్పెన’ సాగిస్తోంది. హీరోహీరోయిన్లతో పాటు డైరెక్టర్ కూడా కొత్తవారే అయినప్పటికీ ఈ సినిమా బాక్సాఫీస్ వద్ద దుమ్మురేపుతోంది. అరంగేట్ర సినిమాతోనే వైష్ణవ్ అదిరిపోయే కలెక్షన్లు సాధిస్తున్నాడు. వైష్ణవ్ తేజ్, కృతి షెట్టి హీరోహీరోయిన్లుగా దర్శకుడు బుచ్చిబాబు రూపొందించిన చిత్రం ‘ఉప్పెన’. గత శుక్రవారం ప్రేక్షకుల ముందుకు వచ్చిన ఈ చిత్రం పాజిటివ్ టాక్‌తో నడుస్తోంది.
అయితే ఈ సినిమా గురించి తాజాగా ఓ ఆసక్తికర విషయం సోషల్ మీడియాలో వైరల్ అవుతోంది. వైష్ణవ్ తన మామ మెగాస్టార్‌ను వసూళ్లలో బీట్ చేశాడంటూ ప్రచారం జరుగుతోంది. మెగాస్టార్ చిరంజీవి హీరోగా రీ ఎంట్రీ ‘ఖైదీ నంబర్ 150’తో ఇచ్చి విషయం తెలిసిందే. ఈ సినిమా ఎంతటి ఘన విజయం సాధించిందో ప్రత్యేకంగా చెప్పనక్కర్లేదు. అయితే ఈ సినిమా తొలి మూడు రోజుల కలెక్షన్లను వైష్ణవ్ తేజ్ నటించిన ‘ఉప్పెన’ సినిమా బీట్ చేసిందంటూ ప్రచారం జరుగుతోంది.
‘ఉప్పెన’ సినిమా విడుదలైన తొలి మూడు రోజుల్లో ప్రపంచవ్యాప్తంగా 50 కోట్ల రూపాయల గ్రాస్‌ను కలెక్ట్ చేసింది. ఈ మూడు రోజుల కలెక్షన్లతోనే 'ఉప్పెన' చిత్రం.. 'ఖైదీ నెంబర్ 150'ని కూడా క్రాస్ చేసేసిందని వార్తలు వస్తున్నాయి. మరో ఆసక్తికరమైన విషయం ఏంటంటే.. తొలి మూడు రోజుల కలెక్షన్ల విషయంలో ‘ఉప్పెన’ సినిమా.. సూపర్ స్టార్ మహేష్ బాబు నటించిన 'మహర్షి', యంగ్ టైగర్ ఎన్టీఆర్ నటించిన ‘అరవింద సమేత’ కూడా బీట్ చేసిందట. తొలి సినిమాతోనే రికార్డు కలెక్షన్లు సాధించిన హీరోగా వైష్ణవ్ నిలిచాడు. నేడు ఈ సినిమా డైరెక్టర్ బుచ్చిబాబు బర్త్‌డే సందర్భంగా ‘ఉప్పెన’ నిర్మాణ సంస్థ రూ.50 కోట్ల పోస్టర్‌ను విడుదల చేసింది.