ஐ.என்.எக்ஸ் மீடியா வழக்கில் சிபிஐ போலீசாரால் சமீபத்தில் கைது செய்யப்பட்ட முன்னாள் மத்திய அமைச்சர் ப.சிதம்பரம் நீதிமன்றத்தின் உத்தரவுப்படி சிறையில் அடைக்கப்பட்டுள்ளார். அவரது ஜாமீன் மனு பலமுறை தள்ளுபடி செய்யப்பட்ட நிலையில் இன்று மீண்டும் அவரது தரப்பில் தாக்கல் செய்யப்பட்ட ஜாமீன் மனு டெல்லி நீதிமன்றத்தில் விசாரணைக்கு வந்தது.

இந்த விசாரணையின்போது ப.சிதம்பரத்தை பார்க்க கவிஞர் வைரமுத்து நீதிமன்றத்திற்கு வந்திருந்தார். நீதிமன்ற வளாகத்தில் ப.சிதம்பரம் மற்றும் வைரமுத்துவின் சந்திப்பு நெகிழ்ச்சியானதாக இருந்ததாக கூறப்படுகிறது. மேலும் மேலும் இந்த சந்திப்பின்போது ப. சிதம்பரம் 'இன்னா செய்தாரை ஒறுத்தல்'.. என்ற குறளை வைரமுத்துவிடம் மேற்கோள் காட்டியதாகவும், அதற்கு கவிஞர் வைரமுத்து 'அகழ்வாரைத் தாங்கும் நிலம்போல' என்ற குறளை மேற்கோள் காட்டி, தைரியமாக இருக்க வேண்டும் எனத் தெரிவித்ததாகவும் செய்திகள் வெளிவந்துள்ளது.

மேலும் ப.சிதம்பரத்தை பார்த்துவிட்டு பின்னர் செய்தியாளர்களிடம் பேசிய வைரமுத்து, 'ப.சிதம்பரத்தை நான் கண்டதும் கண் கலங்கினேன்; அவர் மன உறுதியுடன் நின்றார்; அவரது உடல்நிலை, தொண்டு கருதி நீதிமன்றம் ஜாமீன் வழங்கும் என நம்புகிறேன்' என்று தெரிவித்தார்.