చరణ్ చిత్రంలో వైభవ్?
- IndiaGlitz, [Tuesday,February 28 2017]
చిరంజీవి హిట్ చిత్రాల పేర్లు చెప్ప‌డం మొద‌లుపెట్టిన వారు ద‌ర్శకుడిగా కోదండ‌రామిరెడ్డి పేరును అంత తేలిగ్గా మ‌ర్చిపోలేరు. వారిద్ద‌రి అనుబంధం అలాంటిది. ఇప్పుడు చిరంజీవి త‌న‌యుడు రామ్‌చ‌ర‌ణ్ స్టార్ హీరోగా పేరు తెచ్చుకున్నారు. మ‌రోవైపు కోదండ‌రామిరెడ్డి త‌న‌యుడు వైభవ్ కూడా ముఖానికి మేక‌ప్ వేసుకుంటున్నారు.
వైభవ్ త‌మిళంలో ప‌లు సినిమాలు చేశారు. తెలుగులో హీరోగా చేయాల‌ని ప్ర‌య‌త్నించినా పెద్ద‌గా ఫ‌లితం రాలేదు. దాంతో ఆయ‌న కోలీవుడ్‌మీదే ఫోక‌స్ చేశారు. అయితే తాజాగా వైభ‌వ్‌ను తన సినిమా కోసం సుకుమార్ అప్రోచ్ అయిన‌ట్టు తెలిసింది. మైత్రీ మూవీస్ తెర‌కెక్కిస్తున్న తాజా చిత్రంలో వైభ‌వ్‌ను కీల‌క పాత్ర కోసం తీసుకుంటున్నార‌ని వినికిడి. ఇందులో రామ్‌చ‌ర‌ణ్ స‌ర‌స‌న ముందు అనుప‌మ ప‌ర‌మేశ్వ‌ర‌న్‌ను అనుకున్నారు కానీ ఇప్పుడు స‌మంత నాయిక‌గా న‌టిస్తోంది. ఎక్కువ‌గా ప‌ల్లెటూరి నేప‌థ్యంలో సాగే ఈ సినిమా షూటింగ్ త్వ‌ర‌లోనే ప్రారంభం కానుంది. సి.వి.మోహ‌న్‌, య‌ల‌మంచిలి ర‌విశంక‌ర్‌, ఎర్నేని న‌వీన్ నిర్మాత‌లు.