2013లో 'మిర్చి' సినిమాతో ఫిలిం ప్రొడక్షన్లో అడుగు పెట్టింది యువి క్రియేషన్స్ సంస్థ‌. వంశీ, ప్రమోద్ ఈ బ్యానర్ పై నిర్మించిన.. తమ మొదటి సినిమాతోనే బ్లాక్ బస్టర్ హిట్ ని అందుకున్నారు. కొరటాల శివ ఈ సినిమాతోనే తొలిసారి మెగాఫోన్ పట్టారు. తర్వాత 'రన్ రాజా రన్', 'జిల్', 'భలే భలే మగాడివోయ్', 'ఎక్స్ ప్రెస్ రాజా', 'మహానుభావుడు'.. ఇలా ప్రతీ సినిమాతోనూ తెలుగు ప‌రిశ్ర‌మ‌లో తమ కంటూ ప్రత్యేక స్థానం సొంతం చేసుకున్నారు ఈ బ్యానర్ నిర్మాతలు.

కాగా, 2018 సంవత్సరం ఈ సంస్థ‌కి ప్ర‌త్యేకం కానుంది. కాస్త వివ‌రాల్లోకి వెళితే.. ప్రస్తుతం వీరి బ్యానర్ పై అనుష్క లీడ్ రోల్ పోషిస్తున్న 'భాగమతి' సినిమా తెరకెక్కుతున్న సంగతి తెలిసిందే. 'పిల్ల జమీందార్' డైరెక్టర్ అశోక్ ఈ సినిమాని రూపొందిస్తున్నారు. విడుదల కాకముందే ఈ సినిమా ప్రీ-రిలీజ్ బిజినెస్ తో లాభాలను చూస్తున్నారీ నిర్మాతలు.

అలాగే యంగ్ రెబెల్ స్టార్ 'ప్రభాస్', శ్రద్ధా కపూర్ జంటగా 'సాహో' మూవీని కూడా ఇదే సంస్థ నిర్మిస్తోంది. దీనికి సుజీత్ దర్శకుడు. దాదాపు రూ. 200కోట్ల బ‌డ్జెట్‌తో తెరకెక్కుతున్న సినిమా ఇది. బాహుబలేతర సినిమాల్లో ఇంత హై బడ్జెట్ సినిమా ఇదే కావడం విశేషం. ఈ సినిమా కూడా ప్రీ-రిలీజ్ బిజినెస్ ప‌రంగా మంచి లాభాలతో ఆకట్టుకుంటోంది. చూస్తుంటే.. 2018 సంవ‌త్స‌రం యువి క్రియేష‌న్స్ కి సెన్సేష‌న్ ఇయ‌ర్ కానుంద‌ని టాలీవుడ్ వ‌ర్గాలు పేర్కొంటున్నాయి.