Urvashi Rautela:'ఏపీ సీఎం' తో నటించడం ఆనందంగా వుంది .. పవన్‌ను ఉద్దేశిస్తూ ఊర్వశి ట్వీట్, ఏకీపారేస్తున్న నెటిజన్లు
- IndiaGlitz, [Friday,July 28 2023]
పవర్‌స్టార్ పవన్ కల్యాణ్, ఆయన మేనల్లుడు సాయిధరమ తేజ్ కలిసి నటిస్తున్న సంగతి తెలిసిందే. మేనల్లుడితో జనసేనాని తొలిసారిగా నటిస్తూ వుండటంతో మెగాభిమానులతో పాటు టాలీవుడ్‌లోనూ ఈ సినిమాపై భారీ అంచనాలున్నాయి. విలక్షణ నటుడు, దర్శకుడు సముద్రఖని ఈ సినిమాకు దర్శకుడు. ఈ ఏడాది జూలై 28న ‘బ్రో’ చిత్రాన్ని ప్రేక్షకుల ముందుకు తీసుకురానున్నారు. ఇందులో సాయితేజ్ సరసన కేతికా శర్మ హీరోయిన్‌గా నటిస్తుండగా.. మలయాళ నటి ప్రియా ప్రకాశ్ వారియర్ కీలక పాత్ర పోషిస్తున్నారు.
మూవీ యూనిట్‌కు ఆల్ ది బెస్ట్ చెప్పిన ఊర్వశి :
రిలీజ్ డేట్ దగ్గరపడుతుండటంతో చిత్ర యూనిట్ ప్రమోషన్ కార్యక్రమాలను ముమ్మరం చేసింది. దీనిలో భాగంగా రెండ్రోజుల క్రితం హైదరాబాద్ శిల్పకళా వేదికలో ‘‘బ్రో’’ ప్రీ రిలీజ్ ఈవెంట్ జరిగింది. అతిరథ మహారథులంతా ఈ కార్యక్రమానికి విచ్చేశారు. ఇక ఈ సినిమాలో బాలీవుడ్ నటి ఊర్వశి రౌతేలా ఓ ఐటెం సాంగ్ చేసిన సంగతి తెలిసిందే. ప్రీ రిలీజ్ ఈవెంట్‌లో బ్లాక్ శారీలో సెంటరాఫ్ అట్రాక్షన్‌గా నిలిచిన ఆమె రేపు బ్రో రిలీజ్ సందర్భంగా చిత్ర యూనిట్‌కు ఆల్ ది బెస్ట్ చెబుతూ ఓ ట్వీట్ చేశారు. ప్రస్తుతం ఇది టాలీవుడ్‌తో పాటు రాజకీయాలను ఉలిక్కిపడేలా చేసింది. అంతలా ఊర్వశి ఏం చేసిందంటే.
పండగ చేసుకుంటున్న పవన్ ఫ్యాన్స్ :
సదరు ట్వీట్‌లో పవన్ కళ్యాణ్‌ను ముఖ్యమంత్రి అంటూ సంభోదించింది. ‘‘గౌరవనీయులైన ఆంధ్రప్రదేశ్ ముఖ్యమంత్రితో స్క్రీన్‌ను పంచుకోవడం సంతోషంగా వుంది. మా ‘‘బ్రో’’ రేపు వరల్డ్ వైడ్‌గా గ్రాండ్‌గా రిలీజ్ అవుతోంది. మరణం తర్వాత తన తప్పులను సరిదిద్దుకోవడానికి ఓ అహంకారికి లభించిన సెకండ్ ఛాన్స్ గురించిన కథ. అందర్నీ కలుద్దాం’’ అంటూ ట్వీట్ చేసింది. ఊర్వశి ట్వీట్‌కు పవన్ కల్యాణ్ ఫ్యాన్స్, జనసేన కేడర్ సంతోషంతో ఉబ్బితబ్బిబ్బవుతుండగా.. నెటిజన్లు మాత్రం ట్రోల్ చేస్తున్నారు. ప్రీ రిలీజ్ ఈవెంట్‌లో పవన్‌ను చూడగానే అభిమానులు ‘సీఎం, సీఎం, సీఎం’’ అంటూ నినాదాలు చేయడంతో బహుశా పవర్‌స్టార్‌ను ముఖ్యమంత్రి అనుకుందేమో అంటూ సెటైర్లు వేస్తున్నారు. మొత్తం మీద ఈ ట్వీట్ మాత్రం వైరల్ అవుతోంది.
Delighted to share screen space with the esteemed Chief Minister of Andhra Pradesh @PawanKalyan in our film #BroTheAvatar 🎥 🍿 releases tomorrow #28thJuly worldwide 🌎 story about an arrogant person who is given a second chance to fix his mistakes after death. See you all ♥️… pic.twitter.com/IncVf6q1Kb
— URVASHI RAUTELA🇮🇳 (@UrvashiRautela) July 27, 2023