கொரோனா வைரஸால் எம்பிக்கள், எம்.எல்.ஏக்கள் உள்பட பல விஐபிக்கள் பாதிக்கப்பட்டு வரும் நிலையில் தற்போது மத்திய உள்துறை அமைச்சர் அமித்ஷா அவர்களுக்கும் கொரோனா உறுதி செய்யப்பட்டுள்ளதால் பெரும் பரபரப்பு ஏற்பட்டுள்ளது

மத்திய உள்துறை அமைச்சர் அமித்ஷாவிற்கு கடந்த சில நாட்களாக கொரோனா அறிகுறி இருந்ததாகவும், இதனையடுத்து அவருக்கு பரிசோதனை செய்ததில் கொரோனா தொற்று உறுதி செய்யப்பட்டுள்ளதாகவும் செய்திகள் வெளியாகியுள்ளது.

மேலும் தனக்கு கொரோனா பாதிப்பு உறுதியாகியுள்ளதாக உள்துறை அமைச்சர் அமித்ஷா தனது டுவிட்டரில் உறுதி செய்துள்ளார். எனவே சமீபத்தில் தன்னை சந்தித்தவர்கள், தங்களை தனிமைப்படுத்திக் கொள்ளவும் என்றும் அமித் ஷா அறிவுரை வழங்கி உள்ளார்.

இந்த நிலையில் தொற்று உறுதியானதையடுத்து மருத்துவமனையில் சிகிச்சைக்காக அமித்ஷா அனுமதிக்கப்பட்டுள்ளார். அமித்ஷா அவர்களுக்கு மிக லேசான அறிகுறி மட்டுமே இருப்பதாகவும், இருப்பினும் மருத்துவரின் அறிவுரையின்படி மருத்துவமனையில் அனுமதிக்கப்பட்டுள்ளதாகவும், அவருடைய உடல் சீராக இருப்பதாகவும் மருத்துவமனை வட்டாரங்கள் கூறுகின்றன.