కడప గ‌డ‌ప‌లో జనసేనానికి ఊహించని స్వాగతం!
- IndiaGlitz, [Thursday,February 28 2019]
జ‌న‌సేన పోరాట యాత్ర‌లో భాగంగా క‌ర్నూలు జిల్లాలో మూడు రోజుల ప‌ర్య‌ట‌న ముగించుకుని కడప జిల్లాలో అడుగుపెట్టిన జ‌న‌సేన అధ్య‌క్షుడు ప‌వ‌న్‌క‌ళ్యాణ్ ప్ర‌జ‌లు నీరాజ‌నాలు ప‌లికారు. అహోబిలం నుంచి బ‌య‌లుదేరి కడప జిల్లాకి చేరుకున్న ఆయనకు మైదుకూరు వ‌ద్ద వేలాది మంది జ‌న‌సేన కార్య‌క‌ర్త‌లు, అభిమానులు, ప్ర‌జ‌లు ఘనస్వాగతం ప‌లికారు. జ‌య‌జ‌య‌ధ్వానాలు చేస్తూ కడప జిల్లాలోకి అపూర్వ ఆహ్వానం ప‌లికారు. వాహ‌న‌శ్రేణి పైకి వ‌చ్చి అభిమానుల‌కి అభివాదం చేస్తూ ఆయ‌న ముందుకి సాగారు.
ఇసుక వేస్తే రాల‌నంత‌గా మైదుకూరు ర‌హ‌దారుల‌పై కిక్కిరిసిన జ‌న‌సందోహాన్ని దాటుకుని కాన్వాయ్ ముందుకి రావ‌డానికి అర్ధ‌గంట‌కు పైగా స‌మ‌యం ప‌ట్టింది. దారి పొడుగునా ప్ర‌తి గ్రామం నుంచి ప్ర‌జ‌లు జాతీయ ర‌హ‌దారిపైకి వ‌చ్చి జ‌న‌సేన జెండాలు రెప‌రెప‌లాడాయి. ఖాజీపేట, చెన్నూరుల్లో సైతం వేలాది మంది ప్ర‌జ‌లు రోడ్ల మీద‌కి వ‌చ్చి జనసేనానికి పూల వ‌ర్షంతో స్వాగతం ప‌లికారు. దేవుని కడప ఆర్చ్ నుంచి కడప న‌గ‌రంలోకి ప్ర‌వేశించిన పవన్.. శ్రీ వెంక‌టేశ్వ‌ర‌స్వామి ఆల‌యం వ‌ద్ద భారీ జ‌న‌స‌మూహం పూలాభిషేకంతో స్వాగతం ప‌లికింది. ప‌వ‌న్‌క‌ళ్యాణ్ మ‌ద్ద‌తుగా వామ‌ప‌క్ష నాయ‌కులు, కార్య‌క‌ర్త‌లు సైతం పెద్ద సంఖ్య‌లో త‌ర‌లివ‌చ్చి రోడ్ షోలో పాల్గొన్నారు. కాగా ఈ రేంజ్‌‌లో ఘనస్వాగతం లభిస్తుందని పవన్ కూడా బహుశా ఊహించి ఉండరేమో.!