தேசிய விருது பெற்ற ரீமேக் படத்தில் பிர்யதர்ஷன் - உதயநிதி
- IndiaGlitz, [Tuesday,June 06 2017]
பிரபல மலையாள இயக்குனர் பிரியதர்ஷன் இயக்கவுள்ள அடுத்த படத்தில் நாயகனாக உதயநிதி ஸ்டாலின் நடிக்கவுள்ளார் என்பதையும் இந்த படத்தை மூன்லைட் எண்டர்டெயின்மெண்ட் நிறுவனத்தின் சந்தோஷ் தயாரிக்கவுள்ளார் என்பதையும் நேற்று பார்த்தோம். இந்த படத்தின் ஆரம்பகட்ட பணிகள் விரைவில் தொடங்கவுள்ளன.
இந்நிலையில் இந்த படம் ஒரு மலையாள படத்தின் ரீமேக் என்ற தகவல் தற்போது வெளிவந்துள்ளது. பிரபல மலையாள நடிகர் பகத் பாசில் நடிப்பில் அறிமுக இயக்குனர் திலேஷ் போத்தன் இயக்கிய 'மகேஷிண்டே பிரதிகாரம்' என்ற படத்தின் தமிழ் ரீமேக் படம் தான் பிரியதர்ஷன் - உதயநிதி இணையும் படம் என்று கூறப்படுகிறது.
இந்த படம் கடந்த ஆண்டிற்கான சிறந்த மலையாள படம் என்ற தேசிய விருதினை பெற்றதோடு, இந்த படத்திற்கு திரைக்கதை எழுதிய ஷ்யாம் புஷ்கரன் என்பவருக்கு சிறந்த திரைக்கதையாசிரியருக்கான தேசிய விருதும் கிடைத்தது. மேலும் இந்த படம் ரூ.4.5 கோடி பட்ஜெட்டில் தயாரிக்கப்பட்டு ரு.17.35 கோடி வசூலித்த மாபெரும் வெற்றிப்படம் என்பதும் குறிப்பிடத்தக்கது. மலையாளத்தை போலவே தமிழிலும் வசூல் மற்றும் விருதுகளை குவிக்குமா? என்பதை பொறுத்திருந்து பார்ப்போம்.