உதயநிதி படத்தின் மூன்றாவது ஹீரோயின்?
- IndiaGlitz, [Thursday,September 10 2015]
இயக்குனர் திருக்குமரன் இயக்கத்தில் உதயநிதி ஸ்டாலின் நடித்த 'கெத்து' திரைப்படத்தின் படப்பிடிப்பு முடிந்துவிட்ட நிலையில் தற்போது அவர் 'ஜாலி எல்.எல்.பி' படத்தின் தமிழ் ரீமேக் படத்தில் நடித்து வருகிறார். 'என்றென்றும் புன்னகை' பட இயக்குனர் அஹ்மத் இயக்கத்தின் இந்த படத்தின் படப்பிடிப்பு கோவை பகுதியில் கடந்த 10 நாட்களாக நடைபெற்று வருகிறது.
உதயநிதி ஸ்டாலின் ஹீரோவாக நடிக்கும் இந்த படத்தில் ஹன்சிகா, மற்றும் 'காக்கா முட்டை' புகழ் ஐஸ்வர்யா ராஜேஷ் ஆகிய இரண்டு ஹீரோயின்கள் முக்கிய வேடத்தில் நடித்து வரும் நிலையில் மூன்றாவதாக பூஜா பிஸ்ட் (Pooja Bisht) என்ற நடிகை இந்த படத்தில் இணைந்துள்ளார். பிரபல மாடல் அழகியான இவர், இந்த படத்தில் வழக்கறிஞராக நடித்து வருவதாகவும், இந்த படத்தில் இன்னொரு முக்கிய வேடத்தில் நடிக்கும் பிரகாஷ்ராஜுடன், இவருக்கு அதிக காட்சிகள் இருப்பதாகவும் கூறப்படுகிறது.
இதுவரை உதயநிதி நடித்த அனைத்து படங்களிலும் கிட்டத்தட்ட இரண்டாவது ஹீரோ போன்று நடித்து வந்த சந்தானம் இந்த படத்தில் இல்லை என்றாலும், அவருக்கு பதிலாக முதன்முதலாக உதயநிதியின் படத்தில் விவேக் நடிக்கின்றார். இந்த படத்தை உதயநிதியின் 'ரெட் ஜெயண்ட் மூவீஸ்' நிறுவனம் தயாரித்து வருகிறது.