சூர்யா சொன்னது அப்போது புரியவில்லை ஆனால் இப்போதுதான் புரிகிறது என அமைச்சர் உதயநிதி ஸ்டாலின் நேற்று நடந்த சினிமா விழா ஒன்றில் பேசியுள்ளார்

உதயநிதி ஸ்டாலின் நேற்று நடந்த சினிமா விழாவில் பேசும்போது ஏழாம் அறிவு திரைப்படத்தில் இடம் பெற்ற இட ஒதுக்கீடு குறித்த சர்ச்சைக்குரிய வசனம் நீக்கப்பட வேண்டும் என்று சூர்யா என்னிடம் கேட்டுக் கொண்டதாகவும் ஆனால் அப்போது அரசியல் புரிதல் எனக்கு அதிகமாக இல்லாததால் அந்த வசனத்தை நீக்காமல் விட்டுவிட்டேன் என்றும் கூறினார்.

கடந்த 2011 ஆம் ஆண்டு ஏஆர் முருகதாஸ் இயக்கத்தில் சூர்யா நடிப்பில் உருவான திரைப்படம் ஏழாம் அறிவு. இந்த படம் நல்ல வரவேற்பு பெற்றது. இந்த படத்தில் இட ஒதுக்கீடு குறித்த வசனம் ஒன்று இடம் பெற்றிருக்கும்.

இதுகுறித்து நேற்று உதயநிதி ஸ்டாலின் பேசும்போது, ‘ஏழாம் அறிவு திரைப்படத்தில் இடம்பெற்ற இடஒதுக்கீடு குறித்த வசனத்தை படத்தில் இருந்து நீக்க தயாரிப்பாளர் என்ற முறையில் என்னிடம் சூர்யா கூறினார். ஆனால் அந்த வசனத்தை தான் பெரிதாக அரசியல் புரிதல் இல்லாததால் இருக்கட்டும் என்று விட்டுவிட்டேன். என்னுடைய தயாரிப்பில் வெளியான ஒரு திரைப்படத்தில் இப்படி ஒரு வசனம் இருந்திருக்க கூடாது என்பதை இப்போது நான் உணர்கிறேன்’ என்று அவர் கூறியுள்ளார்.