చెన్నై బ్యూటీ సమంత ప్రధాన పాత్రలో నటిస్తున్న చిత్రం ‘యూ టర్న్’. 2016లో కన్నడంలో విడుదలైన ‘యూ టర్న్’ మూవీకి రీమేక్‌గా ఈ చిత్రం రూపొందుతోంది. కన్నడంలో శ్రద్ధా శ్రీనాథ్ పోషించిన విలేక‌రి పాత్రను ఈ సినిమాలో సమంత పోషిస్తోంది. ఈ మిస్టరీ థ్రిల్లర్‌లో ఆది, రాహుల్ రవీంద్రన్, భూమికా చావ్లా ఇత‌ర‌ కీలక పాత్రలు పోషిస్తున్నారు. కన్నడ వెర్షన్‌ను డైరెక్ట్ చేసిన పవన్ కుమార్ తెలుగు వెర్షన్‌కి కూడా దర్శకత్వం వహిస్తున్నారు. ప్రస్తుతం హైదరాబాద్‌లో జరుగుతున్న షూటింగ్‌లో సమంతపై కొన్ని కీలక సన్నివేశాలను చిత్రీకరిస్తున్నారు.

ఇదిలా ఉంటే.. కన్నడ వెర్షన్‌కి, తెలుగు వెర్షన్‌కి తేడా ఉంటుందని చిత్ర దర్శకుడు పవన్ కుమార్ చెబుతున్నారు. అంతేగాకుండా.. ఈ మూవీ తెలుగు ప్రేక్షకులకు కొత్త అనుభవాన్ని ఇస్తుందని కూడా దర్శకుడు చెబుతున్నారు. ఈ క్రమంలో ఈ సినిమాలో కొన్ని మార్పులు చేశారనీ.. ముఖ్యంగా ఈ సినిమా క్లైమాక్స్‌ను మొత్తం మార్చేశారని సమాచారం. మ‌రి.. ఈ మార్పులు ఈ చిత్రానికి ఏ మేర‌కు ప్ల‌స్ అవుతాయో చూడాలి. ఈ ఏడాది ద్వితీయార్థంలో ఈ సినిమా ప్రేక్ష‌కుల ముందుకు రానుంది.