ఒకరు ప‌రిపూర్ణ‌ నటుడు అయితే.. మరొకరు విలక్షణ నటుడు. వీరిద్దరూ కలిసి నటించి దాదాపు రెండు దశాబ్దాలపైనే అయింది. వారే మ‌ల‌యాళ సూప‌ర్ స్టార్ మోహన్ లాల్, విల‌క్ష‌ణ న‌టుడు ప్రకాష్ రాజ్. 1997లో లెజెండరీ డైరెక్టర్ మణిరత్నం దర్శకత్వంలో తెరకెక్కిన 'ఇద్దరు' సినిమాలో.. ఈ ఇద్దరు మేటి నటులు కలిసి నటించారు.

మళ్ళీ ఇంత కాలానికి కలిసి నటిస్తున్నారు. కాస్త వివరాల్లోకి వెళితే.. శ్రీకుమార్ మీనన్ దర్శకత్వంలో తెరకెక్కుతున్న మళయాళ సినిమా 'ఓడియన్'. ఈ సినిమాతో శ్రీకుమార్ దర్శకుడిగా పరిచయం కానున్నారు. ఈ చిత్రంలో మోహన్ లాల్ కథానాయకుడిగా నటించనుండగా... ప్రకాష్ రాజ్ ప్రతినాయకుడి పాత్రలో కనిపించనున్నారు.

ఈ ఫాంటసీ థ్రిల్లర్ కోసం మోహన్ లాల్ బరువు తగ్గి 40 ఏళ్ళ వ్యక్తిగా కనిపించనున్నారు. ఇక మార్చి 6 నుంచి జరుగనున్న పవర్ ప్యాక్ షెడ్యూల్ రెండు నెలల వరకు సాగుతుందని చిత్ర బృందం వెల్లడిస్తోంది. అక్టోబర్ 18న‌ విడుదల కానున్న ఈ సినిమా తెలుగులోనూ అనువాదం కానుంది.