రెండు వారాల గ్యాప్ తో.. రెండు సినిమాలు..
- IndiaGlitz, [Friday,August 11 2017]
హిందీ సినిమాల మాటెలా ఉన్నా.. టాలీవుడ్ చంద‌మామ కాజల్ అగ‌ర్వాల్‌కి తెలుగు, త‌మిళ భాష‌ల్లో మంచి క్రేజ్‌నే ఉంది. మ‌ధ్య‌లో కొన్ని ప‌రాజ‌యాలు ప‌ల‌క‌రించినా.. అవ‌కాశాలు మాత్రం ఆమెని వ‌రిస్తుండ‌డం తోటి హీరోయిన్ల‌ను ఆశ్చ‌ర్య‌ప‌రుస్తోంది. ఇటీవ‌లే ఖైదీ నెం.150తో మ‌రో సారి త‌న ఖాతాలో విజ‌యాన్ని న‌మోదు చేసుకున్న కాజల్.. రెండు వారాల గ్యాప్‌తో రెండు సినిమాల‌తో సంద‌డి చేయ‌నుంది. అందులో ఒక‌టి తెలుగు చిత్రం కాగా.. మ‌రొక‌టి త‌మిళ చిత్రం.
ఇవి రెండు కూడా అనువాదాల రూపంలో వైస్ వెర్సా ప‌ద్ధ‌తిలో ఆయా భాష‌ల్లోనూ సంద‌డి చేయ‌నున్నాయి. రానా స‌ర‌స‌న కాజల్ తొలిసారిగా న‌టించిన నేనే రాజు నేనే మంత్రి ఈ నెల 11న ప్రేక్ష‌కుల ముందుకు రానుండ‌గా.. కోలీవుడ్ స్టార్ హీరో అజిత్‌తో మొద‌టిసారిగా జోడీక‌ట్టిన వివేగం ఈ నెల 24న విడుద‌ల‌కు సిద్ధ‌మైంది. రెండు వారాల గ్యాప్‌లో వ‌స్తున్న ఈ రెండు చిత్రాల‌పై కాజల్ బోలెడు ఆశ‌ల‌నే పెట్టుకుంది.