ఒకే ఫ్యామిలీకి చెందిన ఇద్ద‌రు క‌థానాయ‌కుల చిత్రాలు.. ఒకే నెల‌లో విడుద‌ల‌వ‌డం అప్పుడ‌ప్పుడు జ‌రిగే విష‌య‌మే. ఈ ఏడాది ఫిబ్ర‌వ‌రిలో మెగా ఫ్యామిలీకి చెందిన సాయిధ‌ర‌మ్ తేజ్ న‌టించిన ఇంటిలిజెంట్‌, వ‌రుణ్ తేజ్ న‌టించిన తొలిప్రేమ.. ఒక రోజు గ్యాప్‌లో ప్రేక్ష‌కుల ముందుకు వ‌చ్చాయి. మ‌రోసారి అటుఇటుగా ఇలాంటి వ్య‌వ‌హార‌మే జూలై నెల‌లోనూ జ‌రిగే అవ‌కాశం క‌నిపిస్తోంది.

కాస్త వివ‌రాల్లోకి వెళితే.. సాయిధ‌ర‌మ్ తేజ్ హీరోగా క‌రుణాక‌ర‌న్ రూపొందించిన ప్రేమ‌క‌థా చిత్రం తేజ్ ఐ ల‌వ్ యు చిత్రాన్ని తొలుత జూన్ 29న విడుద‌ల చేయాల‌ని అనుకున్నా.. కొన్ని కార‌ణాల వ‌ల్ల జూలై 6కి వాయిదా వేశార‌ని తాజాగా క‌థ‌నాలు వినిపిస్తున్నాయి.

ఇక అదే నెల‌లో చిరంజీవి చిన్న‌ల్లుడు క‌ళ్యాణ్ దేవ్ న‌టించిన తొలి చిత్రం విజేత విడుద‌ల కానుంది. అంటే.. ఒక‌ట్రెండు వారాల గ్యాప్‌లో మెగా ఫ్యామిలీకి చెందిన రెండు సినిమాలు సంద‌డి చేయ‌నున్నాయ‌న్న‌మాట‌.