அட்டக்கத்தி பா.ரஞ்சித் இயக்கத்தில் சூப்பர் ஸ்டார் ரஜினிகாந்த் நடித்து வரும் 'கபாலி' படத்தில் வில்லன் வேடத்தில் ஹாலிவுட் நடிகர் ஜெட்லி நடிக்கவுள்ளதாக வெளிவந்த செய்தியை 'கபாலி' படக்குழுவினர் கடந்த சில நாட்களுக்கு முன்னர் மறுத்ததை ஏற்கனவே பார்த்தோம். இந்நிலையில் தற்போது மீண்டும் வெளிநாட்டு நடிகர்கள் இருவர் கபாலி படத்தின் வில்லன் கேரக்டர்களில் நடிக்க ஒப்பந்தமாகியுள்ளதாக கூறப்படுகிறது.

பிரபல தைவான் நாட்டு நடிகர் WinstonChao மற்றும் மலேசிய நடிகர் Rosyam Nor ஆகிய இருவரும் 'கபாலி' படத்தில் ரஜினியின் வில்லன்களாக நடிக்கவுள்ளதாகவும் இவர்கள் இருவருக்கும் மிகப்பெரிய தொகை சம்பளமாக பேசப்பட்டிருப்பதாகவும் கூறப்படுகிறது. மேற்கண்ட இருவருமே மலேசியா மற்றும் அதை சுற்றியுள்ள நாடுகளில் பிரபலமானவர்கள் என்பதால் 'கபாலி' திரைப்படம் அந்த நாடுகளில் பிரமாண்டமாக ரிலீஸ் ஆகும் என எதிர்பார்க்கப்படுகிறது.

சூப்பர் ஸ்டார் ரஜினிகாந்த், ராதிகா ஆப்தே, தன்ஷிகா, கலையரசன், தினேஷ் உள்பட பலர் நடித்து வரும் இந்த படத்திற்கு சந்தோஷ் நாராயணன் இசையமைக்கின்றார். இந்த படத்தை கலைப்புலி எஸ்.தாணு பிரமாண்டமாக தயாரித்து வருகிறார்.