பெங்களூரில் சர்வதேச விமானத் தொழில் கண்காட்சி நாளை தொடங்கி வரும் 24ஆம் தேதி வரை நடைபெறவுள்ளது. இந்த கண்காட்சியில் பல்வேறு சாகச காட்சிகள் நடைபெறவுள்ள நிலையில் அதற்கான ஒத்திகை இன்று நடைபெற்றது. இந்த ஒத்திகையில்  விமானப்படை வீரர்கள் ஈடுபட்டனர்.

இந்த நிலையில் ஒரு சாகச நிகழ்ச்சியின் ஒத்திகைக்காக சூரிய கிரண் என்ற பிரிவை சேர்ந்த இரண்டு போர் விமானங்கள் பயிற்சி பெற்ற போது திடீரென எதிர்பாராத விதமாக இரண்டு விமானங்களும் ஒன்றுடன் ஒன்று மோதி விபத்துக்குள்ளாகின. மோதிய வேகத்தில் இரண்டு விமானங்களும் தரையில் மோதி தீப்பிடித்தன. இதனால் அப்பகுதியில் கரும்புகை எழுந்தது. இதையடுத்து உடனடியாக விரைந்து சென்ற தீயணைப்பு வீரர்கள் எரிந்து கொண்டிருந்த விமானத்தின் தீயை அணைத்தனர்.

இந்த விபத்தில் இரண்டு விமானங்களின் விமானிகளும் காயம் அடைந்திருப்பதாகவும், அவர்கள் மருத்துவமனையில் அனுமதிக்கப்பட்டு சிகிச்சை பெற்று வருவதாகவும் தகவல்கள் வெளிவந்துள்ளது. மேலும் இந்த விமான விபத்தால் அந்த பகுதியை சேர்ந்த பொதுமக்களில் 2 பேரும் படுகாயம் அடைந்துள்ளனர். அவர்களும் சிகிச்சை பெற்று வருகின்றனர்.