ప్రస్తుతం నేచురల్ స్టార్ నాని చేస్తున్న చిత్రం ‘టక్ జగదీష్’. ‘నిన్ను కోరి’, ‘మజిలీ’ వంటి అద్భుతమైన హిట్స్ ఇచ్చిన దర్శకుడు శివ నిర్వాణ దర్శకత్వంలో ఈ చిత్రం తెరకెక్కుతోంది. కాగా.. నేడు క్రిస్మస్‌తో పాటు వైకుంఠ ఏకాదశి పర్వదినం ఒకే రోజు రావడంతో ఈ సందర్భంగా ‘టక్ జగదీష్’ ఫస్ట్ లుక్‌ను చిత్రబృందం విడుదల చేసింది. టక్ వేసుకుని నాని చాలా క్లాస్‌గా నాని ఉన్నప్పటికీ ఫేస్‌లో మాత్రం సీరియస్‌నెస్ కొట్టొచ్చినట్టు కనిపిస్తోంది. వడ్డించిన విస్తరి ముందు కూర్చొని.. వెనుక నుంచి కత్తిని తీస్తున్నట్టున్నట్టుగా ఉన్న పోస్టర్‌ను చిత్రబృందం ఫస్ట్‌లుక్‌గా వదిలింది.

ఒకవైపు నాని చాలా క్లాస్‌గా కనిపిస్తున్నప్పటికీ.. కత్తి తీస్తున్న తీరు చాలా మాస్‌గా కనిపిస్తోంది. దీంతో ఈ సినిమాలో నాని పాత్ర కాస్త సస్పెన్స్‌ను పెంచేదిగానే ఉంది. అలాగే ఈ సినిమాను వచ్చే ఏడాది ఏప్రిల్‌లో విడుదల చేయబోతున్నట్టు పోస్టర్ ద్వారా చిత్రబృందం అధికారికంగా ప్రకటించింది. సన్ స్క్రీన్స్ బ్యానర్‌పై తెరకెక్కుతున్న ఈ సినిమాలో రీతూ వర్మ, ఐశ్వర్య రాజేష్ హీరోయిన్లుగా నటించారు. జగపతి బాబు మరో కీలక పాత్రలో నటించారు. ఈ సినిమాకు తమన్ సంగీతాన్ని అందించారు.