నంద‌మూరి బాల‌కృష్ణ హీరోగా న‌టిస్తోన్న 106 చిత్రం చిత్రీక‌ర‌ణ ద‌శ‌లో ఉంది. బోయ‌పాటి శ్రీను ద‌ర్శ‌క‌త్వంలో సినిమా తెర‌కెక్కుతోంది. తొలి షెడ్యూల్ పూర్త‌యిన ఈ సినిమా క‌రోనా వైర‌స్ ప్ర‌భావం షూటింగ్‌ను ఆపేసింది. క‌రోనా ప్ర‌భావం త‌గ్గిన త‌ర్వాత సినిమా కొత్త షెడ్యూల్ ప్రారంభం కానుంది. తొలి షెడ్యూల్‌ను రామోజీ ఫిలింసిటీలో చిత్రీక‌రించారు. స్క్రిప్ట్ ప్ర‌కారం సినిమాను ప‌లు లోకేష‌న్స్‌లో చిత్రీక‌రించాల్సి ఉంది. ఉదాహ‌ర‌ణ‌కు ఈ సినిమాలో బాల‌య్య డ్యూయెల్ రోల్ చేస్తాడ‌ని టాక్ ఉంది. అందులో ఒక‌టి అఘోరా పాత్ర‌ట‌. అందుకోసం కొన్ని స‌న్నివేశాల‌ను వార‌ణాసిలో చిత్రీక‌రించాల‌నుకున్నారు. కానీ ఇప్పుడు ప‌రిస్థితి చూస్తుంటే షూటింగ్స్‌కు అప్పుడప్పుడే ప‌రిష్మ‌న్స్ దొరికేలా లేవు.

వార‌ణాసి అనే కాదు.. ఇత‌ర లొకేష‌న్స్‌లో షూటింగ్‌ల‌కు అనుమ‌తులు దొర‌క‌డం అనేది అనుమానంగానే మారింది. దీంతో బోయ‌పాటి శ్రీను సినిమా స్క్రిప్ట్‌ను మారుస్తున్నాడ‌ట‌. రెండు తెలుగు రాష్ట్రాల్లోనే షూటింగ్ చేయాల‌నుకుంటున్నాడ‌ని టాక్ విన‌ప‌డుతోంది. ఈ చిత్రంలో భూమిక లేడీ విల‌న్‌గా న‌టిస్తుంద‌ని వార్త‌లు విన‌ప‌డుతున్నాయి. సింహా, లెజెండ్ చిత్రాల త‌ర్వాత బాల‌కృష్ణ‌, బోయ‌పాటి కాంబినేష‌న్‌లో వ‌స్తున్న చిత్రం కావ‌డంతో సినిమాపై భారీ అంచ‌నాలున్నాయి. ద్వారకా క్రియేష‌న్స్ బ్యాన‌ర్‌పై మిర్యాల ర‌వీంద‌ర్ రెడ్డి ఈ చిత్రాన్ని నిర్మిస్తున్నారు. ద‌స‌రా సంద‌ర్భంగా సినిమాను విడుద‌ల చేయ‌డానికి ద‌ర్శ‌క నిర్మాత‌లు ప్లాన్ చేస్తున్నారు.