సీక్రెట్‌గా.. సైలెంట్‌గా ఆ ప‌నిచేస్తున్న త్రివిక్రమ్
- IndiaGlitz, [Monday,December 14 2020]
స్టార్ డైరెక్ట‌ర్‌, రైట‌ర్ త్రివిక్రమ్ తదుప‌రి సినిమాను యంగ్‌టైగ‌ర్ ఎన్టీఆర్‌తో చేయాల్సి ఉంది. 'ఆర్ఆర్ఆర్‌' షూటింగ్ పూర్తి కాగానే తార‌క్ మాట‌ల మాంత్రికుడి సినిమాను షురూ చేస్తాడు. మ‌రి ఈ ఏడాది త్రివిక్రమ్ ద‌ర్శ‌క‌త్వంలో స్టైలిష్‌స్టార్ అల్లుఅర్జున్ హీరోగా న‌టించిన 'అల వైకుంఠ‌పుర‌ములో' జ‌న‌వ‌రిలో విడుద‌లై నాన్ బాహుబ‌లి రికార్డుల‌ను క్రియేట్ చేసింది. అప్ప‌టి నుండి త్రివిక్రమ్ ఎన్టీఆర్ కోసం వెయిటింగ్‌లోనే ఉన్నాడు. మ‌ధ్య‌లో కోవిడ్ ప్ర‌భావం లేకుండా ఉండుంటే ఈపాటికే ఎన్టీఆర్‌తో సినిమాను షురూ చేసేసి ఉండేవాడు మ‌రి. అయితే ఈ గ్యాప్‌ను త్రివిక్రమ్ వేస్ట్ చేయ‌డం లేద‌ట. ఓ స్క్రిప్ట్ వ‌ర్క్‌ని సైలెంట్‌గా పూర్తి చేస్తున్నాడట.
ఇంత‌కీ త్రివిక్రమ్ సైలెంట్‌గా, సీక్రెట్‌గా పూర్తి చేస్తున్న ఆ స్క్రిప్ట్ .. అల్లు అర‌వింద్‌, మ‌ధు మంతెన, మ‌ల్హోత్రాల‌తో క‌ల‌సి అనౌన్స్ చేసిన రామాయణం. గ‌త ఏడాది రూ.500 కోట్ల భారీ బ‌డ్జెట్‌తో రామాయ‌ణంను త్రీడీ టెక్నాల‌జీతో నిర్మిస్తామ‌ని ఈ నిర్మాత‌లు తెలియ‌జేసిన సంగ‌తి తెలిసిందే. అయితే త‌ర్వాత సినిమా ఆగిపోయిందంటూ వార్త‌లు కూడా వ‌చ్చాయి. అయితే సినిమా స్క్రిప్ట్‌ను త‌యారుచేసే ప‌నిని నిర్మాత‌ల్లో ఒక‌రైన అల్లు అర‌వింద్‌.. త్రివిక్ర‌మ్‌కి అప్ప‌గించాడ‌ట. మూడు గంట‌ల వ్య‌వ‌థిలో స్క్రిప్ట్ ఉండేలా త్రివిక్రమ్ కుస్తీ ప‌డుతున్నాడ‌ట. తెలుగు స్క్రిప్ట్ పూర్త‌యిన త‌ర్వాత మిగిలిన భాష‌ల‌కు సంబంధించిన స్క్రిప్ట్ వ‌ర్క్‌ను షురూ చేస్తార‌ని వార్త‌లు వినిపిస్తున్నాయి.