ஜீத்துஜோசப் இயக்கிய மலையாள திரைப்படமான 'த்ரிஷ்யம்' மாபெரும் வெற்றி பெற்றது மட்டுமின்றி கிட்டத்தட்ட இந்தியாவின் முக்கிய மொழிகள் அனைத்திலும் ரீமேக் செய்யப்பட்டு அனைத்து மொழிகளிலும் சூப்பர் ஹிட் ஆகியது என்பது குறிப்பிடத்தக்கது. குறிப்பாக தமிழில் 'பாபநாசம்' என்ற பெயரில் ரீமேக் ஆன இந்த படம் உலக நாயகன் கமல்ஹாசனின் அற்புதமான நடிப்பால் ரூ.100 கோடி வசூல் கிளப்பில் இணைந்தது என்பது இந்த படத்தின் சிறப்பு ஆகும்.

இந்நிலையில் த்ரிஷ்யம், பாபநாசம் படங்களை அடுத்து ஜீத்துஜோசப் இயக்கியுள்ள 'லைஃப் ஆப் ஜோசுட்டி' என்ற திரைப்படத்தின் படப்பிடிப்புகள், போஸ்ட் புரடொக்ஷன் ஆகியவை முடிந்து தற்போது ரிலீஸ் தேதியும் அறிவிக்கப்பட்டுள்ளது. இந்த படம் வரும் செப்டம்பர் 18ஆம் தேதி ரிலீஸ் செய்யவுள்ளதாக அறிவிக்கப்பட்டுள்ளது.

தமிழில் விஜயகாந்த் தம்பியாக 'ராஜ்ஜியம்' என்ற படத்திலும் ஏராளமான மலையாள படங்களிலும் நடித்த முன்னணி நடிகர் திலீப் 'லைஃப் ஆப் ஜோசுட்டி' படத்தில் நடித்துள்ளார். இவருடன் ரச்சனா நாராயணகுட்டி, கலாபவன் மணி ஆகியோர்களும் இந்த படத்தில் நடித்துள்ளனர். அனில் ஜான்சன் இசையமைத்துள்ள இந்த படத்தை ஈராஸ் நிறுவனம் வெளியிடுகிறது. ஜீத்து ஜோசப்பின் முந்தைய படம் போலவே இந்த படமும் சூப்பர் ஹிட் வெற்றி பெற்று, அடுத்தடுத்து பல மொழிகளிலும் ரீமேக் செய்யப்படுமா? என்பதை பொறுத்திருந்துதான் பார்க்க வேண்டும்.