ஸ்ருதிஹாசன் பாணிக்கு மாறும் த்ரிஷா
- IndiaGlitz, [Sunday,March 06 2016]
பழம்பெரும் நடிகைகளான கே.பி.சுந்தரம்பாள், பானுமதி, வரலட்சுமி உள்பட ஒருசில நடிகைகள் தாங்கள் நடிக்கும் படங்களில் சொந்தக்குரலில் டப்பிங் பேசுவது மட்டுமின்றி பாடல்களையும் அவர்களே பாடுவார்கள். காலப்போக்கில் தமிழ் சினிமாவில் பிற மாநிலங்களை சேர்ந்த நடிகைகள் அதிகளவு அறிமுகமானதால் நடிகைகள் சொந்தக்குரலில் டப்பிங் பேசும் பழக்கம் கூட இல்லாமல் போனது.
ஆனால் இந்த நிலை தற்போது மாறி வருகிறது. பிரபல நடிகைகளான நயன்தாரா, சமந்தா, தமன்னா, த்ரிஷா ஆகிய நடிகைகளே சொந்தக்குரலில் டப்பிங் செய்து வருகின்றனர். இந்நிலையில் த்ரிஷா ஒருபடி மேலே போய் தான் நடிக்கும் ஒரு படத்தில் ஒரு பாடலையும் பாடியுள்ளதாக செய்திகள் வெளிவந்துள்ளது.
த்ரிஷா தற்போது நடித்து வரும் த்ரில் படமான 'நாயகி படத்தில் அவர் ஒரு பாடலை பாடவுள்ளதாக செய்திகள் கிட்டத்தட்ட உறுதி செய்துள்ளன. இந்த படத்தை த்ரிஷாவின் மேனேஜர் கிரிதர் தயாரிக்க கோவி என்பவர் இயக்கி வருகிறார்.
ஏற்கனவே ஸ்ருதிஹாசன், லட்சுமி மேனன், ரம்யா நம்பீசன் ஆகியோர் பாடகிகளாக இருந்து வரும் நிலையில் தற்போது இந்த பட்டியலில் த்ரிஷாவும் இணையவுள்ளார் என்பது குறிப்பிடத்தக்கது.