ఎక్స్‌క్లూజివ్: చిరు సినిమా నుంచి తప్పుకున్న త్రిష
- IndiaGlitz, [Friday,March 13 2020]
మెగాస్టార్ చిరంజీవి- కొరటాల శివ కాంబినేషన్‌లో రాబోతున్న సినిమా విజయంతంగా ఎలాంటి ఆటంకాలు లేకుండా షూటింగ్ జరుపుకుంటోంది. అయితే ఇప్పటికే చిరు సరసన కథానాయిక ఎవరనే విషయంపై అభిమానుల్లో ఆసక్తి నెలకొనగా.. అనుష్క, కాజల్, నయనతార, త్రిష ఇలా చాలా మంది పేర్లు పరిశీలించడం జరిగింది. ఫైనల్‌గా త్రిషనే తీసుకున్నారు. అయితే.. తాను ఈ చిత్రంలో చేయట్లేదని.. వైదొలుగుతున్నట్లు ట్విట్టర్ వేదికగా ఆమె ప్రకటించింది.
మరో సినిమాతో వస్తా!
సినిమాలో చేయమని అడిగేటప్పుడు చెప్పిన కథకు.. షూటింగ్‌లో దిగిన తర్వాత చేసే చిత్రీకరణకు చాలా డిఫరెన్స్ ఉంటుందన్నట్లుగా త్రిష ట్విట్టర్‌లో రాసుకొచ్చింది. అంటే కథ ఒకటి చెప్పి మరొకటి షూట్ చేస్తున్నారనే అభిప్రాయాన్ని ఆమె వెల్లడించిందన్న మాట. ‘నేను చిరంజీవి సినిమాలో చేయట్లేదు. చిత్ర యూనిట్‌కు ఆల్ ది బెస్ట్. నా ప్రియమైన అభిమానులారా త్వరలోనే మంచి సినిమాతో తెలుగు ప్రేక్షకుల ముందుకు వస్తాను’ అని త్రిష ట్విట్టర్‌లో వెల్లడించింది.
కాజల్ ఫిక్సయ్యిందా!?
ఇదిలా ఉంటే.. త్రిష స్థానంలో కాజల్‌ను తీసుకోవాలని దర్శకనిర్మాతలు భావిస్తున్నారని విశ్వసనీయ వర్గాల సమాచారం. కాగా ఇప్పటికే చిరు సరసన ఖైదీ నంబర్-150లో కాజల్ నటించి మెప్పించింది. కొరటాల దర్శకత్వంలో కూడా ఇదివరకే జూనియర్ ఎన్టీఆర్ ప్రధాన పాత్రలో నటించిన ‘జనతా గ్యారేజ్’ మూవీలో ‘పక్కా లోకల్..’ అంటూ అదరగొట్టేసింది. ఇటీవలే అల్లరి నరేష్ సినిమాలో కాజల్ చేస్తున్నట్లు కూడా వార్తలు వినిపించాయి. తాజాగా చిరు సినిమాలో బంపరాఫర్ రావడంతో ఆ చిత్రాన్ని వదులుకోవాలని కూడా ఆ బ్యూటీ భావిస్తోందట. మరి ఇందులో నిజానిజాలెంతో తెలియాలంటే అధికారిక ప్రకటన వచ్చేంతవరకూ వేచి చూడాల్సిందే.