கடந்த பத்து வருடங்களுக்கும் மேலாக கோலிவுட் திரையுலகில் முடிசூடா நாயகியாக வலம் வந்து கொண்டிருக்கும் நடிகை த்ரிஷா முக்கிய வேடத்தில் நடித்துள்ள 'நாயகி' திரைப்படத்தின் படப்பிடிப்பு இறுதிக்கட்டத்தை நெருங்கியுள்ள நிலையில் இந்த படத்தின் பாடல்கள் ரிலீஸ் தேதி குறித்த அறிவிப்பு தற்போது வெளியாகியுள்ளது.

தமிழ், தெலுங்கு என இரண்டு மொழிகளில் உருவாகி வரும் 'நாயகி' படத்தின் பாடல்கள் இன்று மாலை 6 மணிக்கு வெளியாகவுள்ளது. இந்த தகவலை நடிகை த்ரிஷா தனது சமூக வலைத்தளத்தில் உறுதி செய்துள்ளார். இந்த இசை வெளியீட்டு விழாவை பிரபல தெலுங்கு சேனல் நேரடியாக ஒளிபரப்பு செய்கிறது என்பது குறிப்பிடத்தக்கது.

த்ரிஷாவின் மேனேஜர் கிரிதர் தயாரித்துள்ள இந்த படத்தில் த்ரிஷா, சுஷ்மா ராஜ், கணேஷ் வெங்கட்ராமன், ஜெயப்பிரகாஷ், மனோபாலா, கோவை சரளா, பிரம்மானந்தம் உள்பட பலர் நடித்துள்ளனர். ரகு குஞ்ச்சே இசையமைத்துள்ள இந்த படத்தை கோவி இயக்கியுள்ளார். இந்த படத்தை ஸ்ரீதேனாண்டாள் பிலிம்ஸ் தமிழகத்தில் ரிலீஸ் செய்யவுள்ளது.