தந்தை பெரியார், பேரறிஞர் அண்ணா மற்றும் மக்கள் திலகம் எம்ஜிஆர் ஆகியோரின் அரசியல் வாரிசு விஜய் தான் என அவரது ரசிகர்கள் திருச்சியில் போஸ்டர் ஒட்டி இருப்பது பரபரப்பை ஏற்படுத்தியுள்ளது.

தளபதி விஜய், கடந்த சில மாதங்களுக்கு முன்னர் "தமிழக வெற்றி கழகம்" என்ற அரசியல் கட்சியை தொடங்கிய நிலையில், சமீபத்தில் தனது கட்சியின் கொடியை அறிமுகப்படுத்தினார். அதே நேரத்தில், அவரது கட்சியின் முதல் மாநாட்டுக்கான தேதி சமீபத்தில் அறிவிக்கப்பட்டது.

இந்த நிலையில், மறைந்த அரசியல் தலைவர்களின் பிறந்த நாளின் போது நடிகர் விஜய் வாழ்த்து தெரிவித்து வருகிறார். சமீபத்தில் பேரறிஞர் அண்ணா மற்றும் தந்தை பெரியாரின் பிறந்தநாளுக்கு அவர் வாழ்த்து தெரிவித்ததோடு, பெரியாரின் பிறந்த நாளன்று அவரது நினைவிடத்திற்கு சென்று மலர் வளையம் வைத்து மரியாதை செலுத்தினார் என்பது குறிப்பிடத்தக்கது.

இந்நிலையில், திருச்சியில் விஜய் ரசிகர்கள், "தமிழக அரசியலில் மூன்றெழுத்து ஈவேரா, அண்ணா, எம்ஜிஆரின் அடுத்த அரசியல் வாரிசு விஜய்" என்று போஸ்டர் ஒட்டியுள்ளனர். இந்த போஸ்டர் பெரும் பரபரப்பை ஏற்படுத்தியுள்ளது.