రాజా ది గ్రేట్‌తో మ‌రో హిట్‌ని త‌న ఖాతాలో వేసుకున్నారు మాస్ మ‌హారాజా ర‌వితేజ‌. ప్ర‌స్తుతం ఆయ‌న ట‌చ్ చేసి చూడు చేస్తున్నారు. విక్ర‌మార్కుడు త‌ర‌హాలో ఓ ప‌వ‌ర్‌ఫుల్ పోలీస్ ఆఫీస‌ర్‌గా ఇందులో క‌నిపించ‌బోతున్నారు. నూత‌న ద‌ర్శ‌కుడు విక్ర‌మ్ సిరికొండ తెర‌కెక్కిస్తున్న ఈ సినిమాలో రాశి ఖ‌న్నా, సీర‌త్ క‌పూర్ క‌థానాయిక‌లుగా న‌టిస్తున్నారు. చిత్రీక‌ర‌ణ తుదిద‌శ‌కు చేరుకున్న ఈ సినిమాని తొలుత సంక్రాంతి కానుక‌గా జ‌న‌వ‌రి 13న విడుద‌ల చేయాల‌ని చిత్ర యూనిట్ ప్లాన్ చేశారు.

అయితే ఏమైందో ఏమో గానీ.. జ‌న‌వ‌రి 25కి పోస్ట్ పోన్ చేసిన‌ట్లుగా వార్త‌లు వ‌చ్చాయి. క‌ట్ చేస్తే.. మ‌రోసారి ఈ సినిమా వాయిదా ప‌డింద‌ని తాజాగా క‌థ‌నాలు వినిపిస్తున్నాయి. ట్రేడ్ వ‌ర్గాల స‌మాచారం ప్ర‌కారం.. ఫిబ్ర‌వరి 2న ఈ సినిమా ప్రేక్ష‌కుల ముందుకు రానుంద‌ని తెలిసింది. అయితే దీనికి సంబంధించిన అధికారిక స‌మాచారం రావాల్సి ఉంది. యాక్ష‌న్ ఎంట‌ర్‌టైన‌ర్‌గా తెర‌కెక్కుతున్న ఈ సినిమాని న‌ల్ల‌మ‌లుపు బుజ్జి, వ‌ల్ల‌భ‌నేని వంశీ నిర్మిస్తున్నారు.