பாரளுமன்ற தேர்தல் இன்னும் ஒருசில மாதங்களில் நடைபெறவுள்ள நிலையில் இந்த தேர்தலில் போட்டியிடவும் கூட்டணி அமைக்கவும் அரசியல் கட்சிகள் வியூகம் அமைத்து வருகின்றன. இப்போதைக்கு திமுக-காங்கிரஸ் ஒரு கூட்டணியாகவும் அதிமுக-பாஜக ஒரு கூட்டணியாகவும் போட்டியிட வாய்ப்புள்ளதாக கூறப்படுகிறது.

இந்த நிலையில் அதிமுக, திமுகவுடன் கூட்டணி இல்லை என்று உறுதிபட கூறிவிட்ட மக்கள் நீதி மய்யம் கட்சியின் தலைவர் கமல்ஹாசன், பாரளுமன்ற, சட்டமன்ற இடைத்தேர்தலில் போட்டியிடுவது குறித்து ஆலோசிக்கவும், கூட்டணி குறித்து ஆலோசிக்கவும், நாளை செயற்குழு மற்றும் பொதுக்குழுவை கூட்டியுள்ளார். இந்த கூட்டத்தில் எந்த கட்சிகளுடன் கூட்டணி என்பது குறித்து நிர்வாகிகளுடன் கமல் ஆலோசனை செய்யவுள்ளார்.

சென்னை ஆழ்வார்ப்பேட்டையில் உள்ள மக்கள் நீதி மய்யம் கட்சியின் தலைமை அலுவலகத்தில் நடைபெறும் இந்த கூட்டத்திற்கு பின்னர் தேர்தல் வியூகம் குறித்தும் கூட்டணி குறித்தும் கமல் செய்தியாளர்களிடம் தெரிவிப்பார் என எதிர்பார்க்கப்படுகிறது.