తొలి చిత్రం `ఆర్‌.ఎక్స్ 100`తో హీరోగా త‌నేంటో ప్రూవ్ చేసుకున్న కార్తికేయ హీరోగా చేసిన `హిప్పి`, `గుణ 369`, `90 ఎం.ఎల్` చిత్రాలు ఆశించిన స్థాయిలో విజ‌యాల‌ను సాధించ‌లేదు. అయితే ఈ సినిమాల మ‌ధ్య‌లో నేచుర‌ల్ స్టార్ నాని హీరోగా చేసిన `గ్యాంగ్‌లీడ‌ర్‌`లో కార్తికేయ విల‌న్‌గా న‌టించాడు. విలన్‌గా కార్తికేయ‌కి మంచి పేరే వ‌చ్చింది. ఇప్పుడు మ‌రోసారి కార్తికేయ విల‌న్‌గా న‌టిస్తున్నాడని సినీ వర్గాల స‌మాచారం. విన‌ప‌డుతున్న స‌మాచారం మేర‌కు కార్తికేయ ఇప్పుడు త‌మిళంలోకి అడుగు పెడుతున్నాడు.

త‌మిళ స్టార్ హీరో అజిత్ హీరోగా, హెచ్‌.వినోద్ ద‌ర్శ‌క‌త్వంలో రూపొందుతోన్న చిత్రం `వ‌లిమై` రూపొందుతోన్న సంగ‌తి తెలిసిందే. ఆ సినిమాలో కార్తికేయ విల‌న్‌గా న‌టిస్తున్నాడట‌. ప్ర‌స్తుతం త‌మిళ హీరో విజ‌య్ తెలుగులో మార్కెట్ పెంచుకునే ప‌నిలో ఉన్నాడు. కాగా అజిత్ కూడా తెలుగు మార్కెట్‌పై క‌న్నేశాడు. కాబ‌ట్టి కార్తికేయ అయితే విల‌న్‌గా న‌టిస్తే.. తెలుగులో కూడా వ‌ర్క‌వుట్ అవుతుంద‌ని ద‌ర్శ‌క నిర్మాత‌లు భావించి ఆయ‌న్ని ప్ర‌తినాయ‌కుడిగా తీసుకున్నార‌ని టాక్‌.

మరో ప‌క్క కార్తికేయ గీతాఆర్ట్స్ బ్యాన‌ర్ అనుబంధ సంస్థ జీఏ 2 పిక్చ‌ర్స్‌లో కార్తికేయ చావు క‌బురు చ‌ల్ల‌గా అనే సినిమా చేస్తున్నాడు. గీతాఆర్ట్స్ కావ‌డంతో కార్తికేయ చాలా కాన్ఫిడెంట్‌గా ఉన్నారు. ఓ ప‌క్క హీరోగా, మ‌రో ప‌క్క విల‌న్‌గా త‌న కెరీర్‌ను ప‌క్కాగా ప్లాన్ చేసుకుంటున్నాడు కార్తికేయ.