ఈ ఏడాది సమ్మర్ తెలుగు సినీ ప‌రిశ్ర‌మ‌కి ఎప్పటికీ గుర్తుండి పోతుంది. ఈ సంవత్సరం వేసవిలో విడుదలైన సినిమాలు తెలుగురాష్ట్రాల్లోనే గాక.. ఓవర్సీస్‌లో కూడా సత్తా చాటుతున్నాయి. కాస్త‌ వివరాల్లోకి వెళితే.. వేసవి ఆరంభంలో విడుదలైన ‘రంగస్థలం’ సినిమా ఇప్పటివరకు ఓవర్సీస్‌లో 46 రోజులకు గాను 3.513 మిలియన్ డాలర్ వసూళ్లను రాబట్టుకుంది. అలాగే.. నాన్ బాహుబ‌లి సినిమాల్లో మొదటి స్థానంలో నిలిచింది. అలాగే.. ఏప్రిల్ 20న విడుదలైన ‘భరత్ అనే నేను’ కూడా 28 రోజులకు గాను 3.409 మిలియన్ డాలర్ కలెక్షన్స్‌ను ఆర్జించింది.

ఇక‌ ఈ నెల 9న విడుదలైన ‘మహానటి’ కూడా కాసుల వర్షాన్నే కురిపిస్తోంది. రిలీజైన 10 రోజుల్లోనే 2.041 మిలియన్ డాలర్ వసూళ్లను రాబట్టుకుంది. ఈ మూడు సినిమాలతో పాటు ఈ నెల 4న ప్రేక్షకుల ముందుకు వచ్చిన ‘నా పేరు సూర్య నా ఇల్లు ఇండియా’ కొంత నిరాశ పరచినా.. ఆ సినిమాను కూడా కలుపుకుంటే (0.750 మిలియన్ డాలర్).. మొత్తంగా స‌మ్మ‌ర్ సినిమాల వ‌సూళ్ళు 10 మిలియన్ డాలర్ మార్కును చేరుకుంది.