హైదరాబాద్‌లో మరోసారి డ్రగ్స్ కలకలం రేగింది. పోలీసులు ఎంత హెచ్చరించినా కొంతమంది వినడం లేదు. కాంగ్రెస్ ప్రభుత్వం వచ్చాక సీఎం రేవంత్ రెడ్డి డ్రగ్స్ దందాపై ఉక్కుపాదం మోపారు. రాష్ట్రంలోనే డ్రగ్స్ అనే మాట వినపడకూడదని పోలీసులకు కీలక ఆదేశాలు జారీచేశారు. దీంతో నార్కోటిక్ బ్యూరో పోలీసులు దీనిపై ప్రత్యేక దృష్టి పెట్టారు. ఈ క్రమంలోనే నార్సింగి పరిధిలో ఓ యువతి ఏకంగా డ్రగ్స్‌తో బయటపడింది.

హైదరాబాద్ కోకాపేటలోని ఓ అపార్ట్‌మెంట్‌లో నివసిస్తున్న ఓ యువతి డ్రగ్స్ వినియోగిస్తున్నట్లు పోలీసులకు సమాచారం అందింది. దీంతో ఎస్‌ఓటి పోలీసులు పక్కా ప్రణాళిక ప్రకారం యువతి ఇంటిపై దాడి చేశారు. ఈ దాడిలో 4 గ్రాముల MDMA డ్రగ్స్ లభించాయి. ఓ యువకుడు కూడా ఇంట్లో ఉండంటతో ఇద్దరిని అదుపులోకి తీసుకున్నారు. వారిపై NDPS యాక్ట్ కింద కేసు నమోదు చేసి దర్యాప్తు చేస్తున్నట్లు పోలీసులు తెలిపారు. ఈ డ్రగ్స్ గోవా నుండి యునిత్ రెడ్డి అనే వ్యక్తి ద్వారా యువతికి చేరినట్లు చెబుతున్నారు.

అయితే ఈ డ్రగ్స్ గోవా నుంచి హైదరాబాద్‌కి ఎలా వచ్చాయి.. ఈ డ్రగ్స్ తరలింపు వెనుక ఉన్న ఎవరున్నారు అనే దానిపై పోలీసులు దర్యాప్తు చేస్తున్నారు. ఈ క్రమంలోనే ఆమె దగ్గర మొబైల్ ఫోన్, ల్యాప్‌టాప్ పరిశీలించగా కీలక విషయాలు వెల్లడయ్యాయి. పట్టుబడిన యువతి ఓ తెలుగు హీరో ప్రేయసిగా గుర్తించారు. ఆ హీరో కొన్ని సినిమాల్లో నటించి మంచి గుర్తింపు తెచ్చుకున్నారు. దీంతో ఆమెకు చిత్ర పరిశ్రమలో ఇంకెవరెవరితో సంబంధాలు ఉన్నాయో అనే కోణంలో కూడా విచారిస్తున్నారు. యువతిని ఉప్పల్ కోర్టులో హాజరుపర్చగా రిమాండ్‌కు తరలించారు.