முட்டை, செருப்பால் அடித்து வெளியேற்றுவோம்: குஷ்புவுக்கு காங்கிரஸ் தலைவர் எச்சரிக்கை
- IndiaGlitz, [Thursday,May 17 2018]
நடிகை குஷ்பு திமுகவில் இருந்தபோது முட்டை, செருப்பால் அடித்து வெளியேற்றப்பட்டவர். அதே நிலை மீண்டும் ஏற்படும் நிலையை குஷ்பு உருவாக்க வேண்டாம் என்று காங்கிரஸ் கட்சியின் தமிழக தலைவர் திருநாவுக்கரசர் எச்சரித்துள்ளார்.
காங்கிரஸ் கட்சியின் தமிழக தலைமை விரைவில் மாறும் என்று நடிகையும், காங்கிரஸ் கட்சியின் செய்தி தொடர்பாளருமான குஷ்பு தெரிவித்திருந்தார். இதற்கு கடும் கண்டனம் தெரிவித்துள்ள திருநாவுக்கரசர் கூறியபோது, 'தி.மு.க.வில் இருந்தபோது குஷ்பு ஏன் வெளியேற்றப்பட்டார் என்பது தமிழக மக்களுக்கும், தி.மு.க. தொண்டர்களுக்கும் தெரியும். முட்டையால், செருப்பால் அடித்து வெளியேற்றினார்கள். அந்தநிலை காங்கிரஸ் கட்சியிலும் திரும்பும் என்பதை எச்சரிக்கையாக சொல்லிக் கொள்ள விரும்புகிறேன்.
நான் ராகுல்காந்தியின் நேரடி உத்தரவின் பேரில் தமிழக காங்கிரஸ் தலைவராக நியமிக்கப்பட்டுள்ளேன். குஷ்பு என்னை பற்றி பேசுவதற்கு எந்த அருகதையும் கிடையாது. என்னை பதவியில் இருந்து நீக்குவேன் என்று குஷ்பு சொல்கிறார். அந்த யோக்கியதை அவருக்கு கொஞ்சம் கூட கிடையாது. என்னை பதவி நீக்கம் செய்ய அவர் யார்?. பத்திரிகைகளில் செய்தி வர வேண்டும் என்பதற்காக என்ன வேண்டுமானாலும் பேசலாமா?. இதை வன்மையாக கண்டிக்கிறேன்.
நான் ஜெயலலிதாவையே பார்த்தவன், குஷ்பு எம்மாத்திரம். 2 மாதத்தில் என்னை தலைவர் பதவியில் இருந்து தூக்கி விடுவதாக குஷ்பு கூறுகிறார். முடியுமா?. அப்படி என்னை பதவியில் இருந்து தூக்கவில்லை என்றால் கட்சியில் இருந்து ராஜினாமா செய்ய அவர் தயாரா?. சொன்னது நிறைவேறவில்லை என்றால் தூக்கில் தொங்க தயாரா?. வேண்டாத வேலைகளை, கயிறு திரிப்பதை இத்துடன் நிறுத்திக்கொள்ள வேண்டும். இவ்வாறு திருநாவுக்கரசர் ஆவேசமாக கூறியுள்ளார்.