காது சவ்வு கிழிந்துவிடும்: மு.க.ஸ்டாலினை எச்சரித்த முதல்வர் பழனிசாமி
- IndiaGlitz, [Monday,April 08 2019]
தமிழகத்தில் மக்களவை தேர்தல் நடைபெற இன்னும் பத்து நாட்கள் மட்டுமே இருக்கும் நிலையில் அரசியல் கட்சி தலைவர்கள் தமிழகம் முழுவதும் தீவிர பிரச்சாரம் செய்து வருகின்றனர். கிட்டத்தட்ட அனைத்து கட்சி தலைவர்களும், தாங்கள் வெற்றி பெற்றால் என்ன செய்வோம் என்று சொல்வதைவிட எதிர்க்கட்சியை குறை சொல்லியே பிரச்சாரம் செய்து வருகின்றன.
இந்த நிலையில் ஒட்டன்சத்திரம் அருகே நேற்று பிரச்சாரம் செய்த முதல்வர் பழனிச்சாமி, 'நாங்கள் மக்களை சந்தித்து பிரச்சாரம் செய்யும்போது, 'இந்த திட்டங்களை செய்கிறோம், அதை செய்கிறோம் என சொல்கிறோம். ஆனால் ஸ்டாலின் பிரச்சாரம் செய்யும்போது என்னையும் பிரதமரையும் திட்டுவதையே வழக்கமாக கொண்டுள்ளார். மரியாதை கொடுத்து பேசினால்தான் அவருக்கும் மரியாதை கிடைக்கும். நான் திருப்பி பேசினால் காது சவ்வு கிழிந்துவிடும்' என்று முதல்வர் ஸ்டாலினை காட்டமாக விமர்சனம் செய்தார்.
மேலும் தான் சாதாரண தொண்டனாக இருந்து உழைத்து இந்த பதவிக்கு வந்துள்ளதாகவும், தந்தையின் ஆதரவில் கொள்ளைப் புறம் வழியாக ஸ்டாலின் அரசியலுக்கு வந்ததாகவும் விமர்சித்த எடப்பாடி பழனிசாமி, ஸ்டாலின் கூலிப்படை தலைவன் போன்று செயல்படுவதாகவும், அவரை போன்றே அவரது தொண்டர்களும் இருப்பதாகவும் விமர்சித்தார்.
மேலும் இந்தியாவிலேயே ஏழைகளுக்கு கொடுப்பதை தடுக்கும் ஒரே கட்சி திமுக என கூறிய முதல்வர் எடப்பாடி பழனிசாமி, அக்கட்சியின் நிர்வாகிகள் ஒழுங்காக இருந்தால் பெண்கள் பாதுகாப்பாக இருப்பார்கள் என விமர்சித்தார். முதல்வரின் இந்த காரசாரமான பேச்சு பெரும் பரபரப்பை ஏற்படுத்தியுள்ளது.