கோவாவில் நடைபெற்ற சர்வதேச திரைப்பட விழாவில் கோல்டன் ஐகான் விருதை பெற்ற சூப்பர் ஸ்டார் ரஜினிகாந்த் சற்றுமுன் சென்னை திரும்பினார். அப்போது அவர் சென்னை விமான நிலையத்தில் செய்தியாளர்களை சந்தித்தபோது, ‘2021ஆம் ஆண்டு தமிழக மக்கள், தமிழக அரசியலில் மிகப்பெரிய அதிசயத்தையும் அற்புதத்தையும் நிகழ்த்துவார்கள் என்று கேள்வி ஒன்றுக்கு பதிலளித்தார்.

ரஜினிகாந்த் அவர்களின் இந்த பேட்டி குறித்து தமிழக முதல்வர் எடப்பாடி பழனிச்சாமி அவர்கள் கூறியபோது, ‘எந்த அடிப்படையில் 2021ஆம் ஆண்டில் அதிசயம் நிகழும் என ரஜினி கூறுகிறார் என்று தெரியவில்லை என்றும், ரஜினி கட்சி தொடங்கிய பிறகே அவரை பற்றியும், அவரது கருத்தை பற்றியும் விரிவாக கூற முடியும் என்றும், 2021 ஆம் ஆண்டில் அதிமுக அரசு மலரும் என்பதையே அதிசயம் நிகழும் என்று ரஜினி கூறியிருக்கலாம் என்றும், 2021 ஆம் ஆண்டில் அதிமுவை சேர்ந்த ஒருவரே முதல்வர் வேட்பாளராக இருப்பார் என்றும் கூறினார்.

பொதுவாக ரஜினிகாந்த் பேட்டி அளித்தால் அவரது கருத்துக்கு அதிமுக அமைச்சர்கள் மட்டுமே பதிலடி கொடுப்பார்கள். ஆனால் இம்முறை முதல்வர் உடனடியாக ரியாக்சன் செய்ததை அரசியல் விமர்சர்கள் கூர்ந்து கவனித்து வருகின்றனர்.