விஜயகாந்த் வீட்டிற்கு செல்லும் காங்கிரஸ் பிரமுகர்! அணி மாறுகிறதா தேமுதிக?
- IndiaGlitz, [Thursday,February 21 2019]
அதிமுக கூட்டணியில் இணைய தேமுதிக தலைவர்கள் பேச்சுவார்த்தை நடத்தி வரும் நிலையில் தேமுதிக தலைவர் விஜயகாந்த் வீட்டிற்கு காங்கிரஸ் பிரமுகர் திருநாவுக்கரசர் சற்றுமுன் சென்றுள்ளார்.
விஜயகாந்த் உடல்நலன் குறித்து விசாரிக்க அவரது இல்லத்திற்கு தமிழக காங்கிரஸ் முன்னாள் தலைவர் திருநாவுக்கரசர் சென்றுள்ளதாக கூறப்பட்டாலும் தேர்தல் கூட்டணி பேச்சுவார்த்தை நடந்து வரும் நிலையில் விஜயகாந்தை திருநாவுக்கரசர் சந்திப்பதை அரசியல் சாயம் பூசாமல் பார்க்க முடியவில்லை என அரசியல் விமர்சகர்கள் கருத்து தெரிவித்து வருகின்றனர்.
நேற்று திமுக-காங்கிரஸ் கூட்டணி உறுதி செய்யப்பட்டு காங்கிரஸ் கட்சிக்கு 10 தொகுதிகள் வழங்கப்பட்டது. இதனையடுத்து திமுக தலைவர் முக ஸ்டாலின் கூறியபோது 'தேமுதிகவுடன் கூட்டணி குறித்து இதுவரை பேசவில்லை என்றும் அவ்வாறு பேசினால் நிச்சயம் பத்திரிகையாளர்களுக்கு தெரிவிப்போம் என்றும் கூறினார்.
அதிமுக கூட்டணியில் தேமுதிக 10 தொகுதிகள் கேட்பதாகவும், ஆனால் அதிமுக 4 தொகுதிகளை மட்டுமே தேமுதிகவுக்கு கொடுக்க முன்வந்துள்ளதாகவும் கூறப்படும் நிலையில் திமுக அணிக்கு தேமுதிக மாறுமா? என்பதை பொறுத்திருந்து பார்ப்போம்.