ఒకే నెలలో మూడు సినిమాలతో..
- IndiaGlitz, [Tuesday,May 22 2018]
‘మళ్ళీ మళ్ళీ ఇది రాని రోజు’ లాంటి క్లాస్ చిత్రంతో తెలుగు ప‌రిశ్ర‌మ‌కు ప‌రిచ‌య‌మై.. తొలి తెలుగు చిత్రంతోనే ఫిల్మ్ ఫేర్‌ను కూడా సొంతం చేసుకున్న సంగీత దర్శకుడు గోపిసుందర్. ఆ త‌రువాత ‘ఊపిరి’, ‘ప్రేమమ్’, ‘నిన్నుకోరి’ లాంటి సినిమాలతో తనకంటూ ఓ గుర్తింపును సంపాదించుకున్నారు. ఇదిలా ఉంటే.. ఈ ఏడాదిలోనూ చెప్పుకోద‌గ్గ సినిమాలతో సంద‌డి చేయ‌నున్నారు గోపి. ముఖ్యంగా.. ఈ ఏడాది జూన్ నెలలో ముచ్చ‌ట‌గా మూడు సినిమాలతో ప్రేక్షకులని ఉర్రూతలూగించడానికి సిద్ధపడుతున్నారాయ‌న.
ఆ వివరాల్లోకి వెళితే.. రాజ్ తరుణ్, అమైరా దస్తూర్ జంటగా గోపీ సుంద‌ర్ స్వ‌ర‌సార‌థ్యంలో రూపొందిన ‘రాజుగాడు’ సినిమా జూన్ 1న విడుదల కానుంది. అలాగే.. శ్రీనివాస్ రెడ్డి, సిద్ధి ఇద్నాని హీరోహీరోయిన్లుగా తెరకెక్కిన ‘జంబలకిడిపంబ’ జూన్ 14న ప్రేక్షకుల ముందుకు రానుంది. అదేవిధంగా.. సాయిధరమ్ తేజ్, అనుపమ పరమేశ్వరన్ హీరోహీరోయిన్లుగా ఎ.క‌రుణాక‌ర‌న్ దర్శకత్వంలో రూపొందిన సినిమా ‘తేజ్ ఐ లవ్ యు’. గోపీ సంగీత‌మందించిన ఈ మూవీ జూన్ 21న థియేటర్‌లలోకి వ‌స్తోంది. డిఫ‌రెంట్ జోన‌ర్‌ల‌తో తెరకెక్కిన ఈ సినిమాల్లో గోపీకి ఏ సినిమా మరింత పేరు తీసుకువ‌స్తుందో చూడాలి.