తెలుగు ప్రేక్ష‌కుల‌కు ఈ క్రిస్మ‌స్ ప్ర‌త్యేకం కానుంది. ఎందుకంటే.. పండ‌గ సంద‌ర్భంలో వ‌రుస‌గా మూడు రోజుల పాటు ఆస‌క్తిక‌ర‌మైన సినిమాలు విడుద‌ల కానుండ‌డ‌మే అందుకు కార‌ణంగా చెప్పొచ్చు. ఆ మూడు చిత్రాలే.. ఎం.సి.ఎ, హ‌లో, ఒక్క క్ష‌ణం. వీటిలో ముందుగా ఎం.సి.ఎ ప్రేక్ష‌కుల ముందుకు రానుంది.

ఆరు వరుస విజ‌యాల త‌రువాత నాని హీరోగా న‌టిస్తున్న ఈ చిత్రాన్ని స‌క్సెస్‌ఫుల్ చిత్రాల నిర్మాత‌ దిల్ రాజు నిర్మిస్తున్నారు. శ్రీ‌రామ్ వేణు ద‌ర్శ‌కుడు. సాయిప‌ల్ల‌వి హీరోయిన్‌గా న‌టించిన ఈ సినిమాని డిసెంబ‌ర్ 21న రిలీజ్ చేయ‌నున్నారు. ఆ త‌రువాత రోజు అంటే డిసెంబ‌ర్ 22న హ‌లో చిత్రం సంద‌డి చేయ‌నుంది.

అక్కినేని అఖిల్ హీరోగా న‌టిస్తున్న ఈ చిత్రానికి ఇష్క్‌, మ‌నం, 24 చిత్రాల‌తో హ్యాట్రిక్ విజ‌యాల‌ను సొంతం చేసుకున్న విక్ర‌మ్ కె.కుమార్ ద‌ర్శ‌కుడు. కింగ్ నాగార్జున నిర్మిస్తున్నారు.

ఇక డిసెంబ‌ర్ 23న ఒక్క క్ష‌ణం రాబోతోంది. ఎక్క‌డికి పోతావు చిన్న‌వాడాతో విజ‌యం అందుకున్న వి.ఐ.ఆనంద్ ద‌ర్శ‌క‌త్వం వ‌హిస్తున్న ఈ చిత్రంలో శ్రీ‌ర‌స్తు శుభ‌మ‌స్తుతో హిట్ అందుకున్న అల్లు శిరీష్ హీరోగా న‌టిస్తున్నాడు. మ‌రి ఈ మూడు చిత్రాల‌లో ఏ సినిమాకి ప్రేక్ష‌కులు విజ‌యాన్ని అందిస్తారో చూడాలి.