விஜய் டிவியில் பிக் பாஸ் நிகழ்ச்சி விறுவிறுப்பாக சென்று கொண்டிருக்கும் நிலையில், நாளைய எலிமினேஷனில் வெளியேறப்போகும் போட்டியாளர் யார் என்ற தகவல் கசிந்துள்ளது.

பிக் பாஸ் நிகழ்ச்சி 18 போட்டியாளர்களுடன் அட்டகாசமாக தொடங்கப்பட்ட நிலையில், இதுவரை ரவீந்தர், அர்னவ், தர்ஷா ஆகியோர் எலிமினேஷன் செய்யப்பட்டுள்ளனர். இந்த நிலையில் நாளை நான்காவது போட்டியாளர் எலிமினேஷனாக உள்ளார் எனத் தகவல் வெளியாகியுள்ள நிலையில், அவர் அன்ஷிதா என்று கூறப்படுகிறது.

இந்த வார நாமினேஷன் பட்டியலில் ரஞ்சித், தீபக், சத்யா, சுனிதா, பவித்ரா ஜனனி, அன்ஷிதா மற்றும் அருண் ஆகிய 9 பேர் இடம்பெற்றுள்ளனர். இவர்களில் குறைந்த வாக்குகளை பவித்ரா ஜனனி மற்றும் அன்ஷிதா ஆகிய இருவரும் பெற்று இருந்த நிலையில், அன்ஷிதா இந்த வாரம் பிக் பாஸ் வீட்டிலிருந்து வெளியேறியுள்ளதாக தகவல் வெளியாகியுள்ளது.

'செல்லம்மா' சீரியல் மூலம் பிரபலமான அன்ஷிதா, 'குக் வித் கோமாளி' நிகழ்ச்சியிலும் கலந்து கொண்டார். தற்போது பிக் பாஸ் நிகழ்ச்சியால் இன்னும் பிரபலமாவார் என எதிர்பார்க்கப்பட்ட நிலையில், நான்காவது வாரமே அவர் வெளியேறியிருப்பது அவரது ரசிகர்களுக்கு அதிருப்தியை ஏற்படுத்தியுள்ளது.

அதேபோல், அர்னவ் மற்றும் அன்ஷிதா இருவரும் ஜோடியாக சீரியலில் நடித்திருந்த நிலையில், இருவரும் பிக் பாஸ் வீட்டிற்குள் வந்ததும் காதல் கண்டெண்ட் கொடுப்பார்கள் என்றும் எதிர்பார்க்கப்பட்டது. ஆனால் இருவரும் அடுத்தடுத்து வெளியேறியுள்ளனர்.

இந்த நிலையில் இந்த வாரம் ஐந்து புதிய போட்டியாளர்கள் பிக் பாஸ் வீட்டிற்குள் வர இருப்பதாகக் கூறப்படுவதால், நிகழ்ச்சி இன்னும் விறுவிறுப்பாகும் என்று எதிர்பார்க்கப்படுகிறது.