கொரோனா நேரத்தில் இதெல்லாம் வேண்டாமே... பெண்களை நோக்கி வேண்டுகோள் வைக்கும் எகிப்து!!!
- IndiaGlitz, [Tuesday,June 30 2020]
கொரோனா நோய்த்தொற்று உலகம் முழுவதும் தாக்கத்தை ஏற்படுத்தி வரும் நேரத்தில் எகிப்து அரசு ஒரு முக்கியமான அறிவிப்பை வெளியிட்டு இருக்கிறது. கொரோனா நோய்த்தொற்று “கர்ப்பிணி பெண்களை மிக எளிதாக தாக்கிவிடும் அபயாம் இருப்பதாகக் கூறி” பெண்கள் கருவுறுதலைத் தள்ளிப்போட வேண்டும் என்று கேட்டுக் கொண்டுள்ளது அந்நாட்டு அரசு. கொரோனா நோய்த்தொற்று மனிதர்களின் நோய் எதிர்ப்பு மண்டலங்களை மிக எளிதாகத் தாக்கிவிடும் தன்மைக் கொண்டது. ஏற்கனவே, பெண்கள் கருவுற்று இருக்கும்போது அவர்களின் நோய் எதிர்ப்பு மண்டலம் சற்று பலவீனம் கொண்டதாக இருக்கும். எனவே கொரோனா பரவல் நேரத்தில் பெண்கள் கருவுறுதலை தள்ளிப்போட வேண்டும் என்ற கோரிக்கையை தீவிர பிரச்சாரமாக மேற்கொண்டு வருகிறது அந்நாட்டின் சுகாதாரத் துறை அமைச்சகம்.
இதுதொடர்பாக அறிக்கை வெளியிட்டுள்ள சுகாதாரத்துறை அமைச்சகம், “கொரோனா தொற்றுக்கு ஆளாகாமல் இருக்க கருத்தடை சாதனங்களைப் பயன்படுத்தி கருவுறுதலைப் பெண்கள் தற்காலிகமாகத் தள்ளி வைக்க வேண்டும். கருவுற்றிருக்கும் பெண்களுக்கு நடைப்பயிற்சி மிகச் சிறந்த உடற்பயிற்சி அவசியம். ஆனால் தற்போதைய கொரோனா காலத்தில் கர்ப்பிணிப் பெண்கள் வீட்டை விட்டு வெளிவருவது ஆபத்தாக முடியும். எனவே வீட்டுக்குள்ளே அவர்கள் தொடர்ந்து இயக்கத்தில் இருக்க வேண்டும்‘’ எனக் கேட்டுக் கொண்டுள்ளது.
சுகாதாரத் துறையின் முடிவிற்கு அந்நாட்டின் மருத்துவர்கள் தற்போது வரவேற்பு தெரிவித்து வருகின்றனர். கொரோனாவின் ஆரம்பக் கட்த்திலேயே இந்த முடிவை எடுத்து இருக்க வேண்டும் எனவும் சில கருத்து தெரிவித்து உள்ளனர். 9 கோடிக்கும் மேல் மக்கள் தொகையை கொண்டுள்ள எகிப்தில் தற்போது வரை 66 ஆயிரத்து 754 பேருக்கு கொரோனா உறுதி செய்யப்பட்டு இருக்கிறது. மேலும் 2 ஆயிரத்து 872 பேர் உயிரிழந்துள்ளனர் என்பதும் குறிப்பிடத்தக்கது.