பிரபல நடிகர் மற்றும் இயக்குனர் சமுத்திரக்கனி நடித்த ’திரு மாணிக்கம்’ என்ற திரைப்படம் விரைவில் வெளியாக இருக்கும் நிலையில் இந்த படத்தின் டீசர் சற்று முன் வெளியாகி இணையத்தில் வைரல் ஆகி வருகிறது.

சமுத்திரகனி தனது மனைவி குடும்பத்துடன் சந்தோஷமாக வாழ்ந்து கொண்டிருந்த நிலையில் திடீரென அவருக்கு ஒரு சிக்கல் ஏற்பட்டதை அடுத்து அவர் போலீசுக்கு பயந்து காட்டுப்பகுதியில் பதுங்கி இருக்கிறார். அவரை பிடிக்க போலீஸ் படை சுற்றியுள்ள நிலையில் தான் அவர் எடுக்கும் ஒரு அதிரடி முடிவு திருப்புமுனையை ஏற்படுத்தி இருக்கிறது.

சமுத்திரக்கனி, பாரதிராஜா, அனன்யா, தம்பி ராமையா, இளவரசு, நாசர், சின்னி ஜெயந்த், வடிவுக்கரசி, ஸ்ரீமான் உள்ளிட்ட பலர் நடித்துள்ள இந்த படத்தை நந்தா பெரியசாமி இயக்கி உள்ளார்.

விஷால் சந்திரசேகர் இசையில், சுகுமார் ஒளிப்பதிவில், குணா படத்தொகுப்பில் உருவாகியுள்ள இந்த படம் விரைவில் திரையரங்குகளில் வெளியாக உள்ளது என்பது குறிப்பிடத்தக்கது.