టాలీవుడ్‌లో సక్సెస్ ఫుల్ ప్రొడ్యూసర్ గా పేరు తెచ్చుకున్నారు నిర్మాత దిల్ రాజు. ఈయన సంస్థ‌లో ఓ సినిమా చేసి, త‌మ‌ ప‌నితీరుతో మెప్పిస్తే... దర్శకుడికైనా, నటుడికైనా, నటికైనా మరో సినిమాకి అవకాశం ఇచ్చేస్తూ ఉంటారు రాజు. కుదిరితే ఆరంభంలోనే వీరితో ఒప్పందం కుదుర్చుకుంటారు ఆయ‌న‌. ఇప్పటికే ఈయన సంస్థ‌లో యువ కథానాయకుడు నాని నేను లోకల్`, ఎం.సి.ఎ` సినిమాలతో విజయాలను అందుకున్న సంగ‌తి తెలిసిందే. ఇప్పుడు నానితో మరో సినిమా చేయడానికి దిల్ రాజు సిద్ధపడినట్టు వార్తలు వినిపిస్తున్నాయి. ఈ హ్యాట్రిక్ ప్రాజెక్టు చేయబోతున్నట్టు నాని కూడా ఇప్ప‌టికే ప్రకటించేశారు. అయితే ఇంకా దర్శకుడు గురించి వివరాలు తెలియరాలేదు.

ప్రస్తుతం నాని కృష్ణార్జునయుద్ధం` పోస్ట్ ప్రొడక్షన్ పనులలో బిజీగా ఉన్నారు. ఈ చిత్రం తర్వాత మార్చి నెల నుంచి శ్రీరామ్ ఆదిత్య డైరెక్షన్‌లో నాగ్‌తో ఓ మల్టీస్టారర్ మూవీ చేయబోతున్నట్టు ఇప్పటికే ప్రకటించారు. అలాగే హను రాఘవపూడి, విక్రమ్ కుమార్ లతో కూడా సినిమాలు చేయబోతున్నారు. హను రాఘవపూడి సినిమాకి నిర్మాత సిద్ధంగా ఉన్నారు. బహుశా విక్రమ్ కుమార్ డైరెక్షన్లో తెరకెక్కబోయే సినిమాని దిల్ రాజు నిర్మించనున్నారనే వార్తలు వినిపిస్తున్నాయి.