యూత్‌ఫుల్ మూవీస్‌కు కేరాఫ్ అడ్ర‌స్‌గా నిలిచిన ద‌ర్శ‌కుడు మారుతి. ఈ రోజుల్లో నుంచి మ‌హానుభావుడు వ‌ర‌కు యువ‌త‌నే ల‌క్ష్యంగా చేసుకుని ఆయ‌న రూపొందించిన చిత్రాల‌న్నీ మంచి ఆద‌ర‌ణ పొందాయి. ఇదిలా ఉంటే.. ప్ర‌స్తుతం ఈ టాలెంటెడ్ డైరెక్ట‌ర్‌.. యువ క‌థానాయ‌కుడు నాగ‌చైత‌న్య‌తో శైల‌జా రెడ్డి అల్లుడు (ప్ర‌చారంలో ఉన్న పేరు) చేస్తున్నారు. ర‌మ్య‌కృష్ణ ఓ ప్ర‌ధాన పాత్ర‌లో న‌టిస్తున్న ఈ చిత్రంలో అను ఇమ్మాన్యుయేల్ క‌థానాయిక‌గా న‌టిస్తోంది.

గోపీసుంద‌ర్ సంగీత‌మందిస్తున్న ఈ చిత్రాన్ని సితార ఎంట‌ర్‌టైన్‌మెంట్స్ సంస్థ నిర్మిస్తోంది. ప్ర‌స్తుతం శ‌ర‌వేగంగా షూటింగ్ జ‌రుపుకుంటున్న ఈ సినిమాని సెప్టెంబ‌ర్‌లో విడుద‌ల చేయ‌డానికి స‌న్నాహాలు జ‌రుగుతున్నాయ‌ని తెలిసింది. ఆస‌క్తిక‌ర‌మైన విష‌య‌మేమిటంటే.. ద‌ర్శ‌కుడిగా మారుతికి మంచి విజ‌యాల్ని, గుర్తింపు తీసుకువ‌చ్చిన భ‌లే భ‌లే మ‌గాడివోయ్‌, మ‌హానుభావుడు చిత్రాలు కూడా ఇదే నెల‌లో ప్రేక్ష‌కుల ముందుకు వ‌చ్చాయి. మ‌రి.. ఆయ‌న తాజా చిత్రం కూడా అదే బాట‌లో వెళుతుందేమో చూడాలి.