சூப்பர்ஸ்டார் ரஜினிகாந்த் நடித்து வரும் 'கபாலி' திரைப்படத்தின் படப்பிடிப்பு இறுதிக்கட்டத்தை நெருங்கிவிட்டது. இன்னும் ஒருசில நாட்கள் மட்டுமே படப்பிடிப்பு உள்ளதாக படக்குழுவினர் தெரிவித்துள்ளனர். இந்த படத்தை தயாரித்து வரும் கலைப்புலி எஸ்.தாணு, இளையதளபதி விஜய் நடிக்கும் 'தெறி' படத்தையும் தயாரித்து வருகிறார்.

இந்நிலையில் இந்த இரண்டு படங்களின் ரிலீஸ் தேதி குறித்த தகவல்கள் தற்போது வெளிவந்துள்ளது.

விஜய் நடித்த 'தெறி' படம் 2016ஆம் ஆண்டு ஏப்ரல் 14ஆம் தேதியும், ரஜினி நடித்த 'கபாலி' படம் மே 1ஆம் தேதியும் வெளியாகவுள்ளதாக கூறப்படுகிறது.

ஏப்ரல் 14ஆம் தேதி தமிழ்ப்புத்தாண்டு தின விடுமுறை தினம் என்பதும், மே 1ஆம் தேதி தொழிலாளர் தின விடுமுறை நாள் என்பதும் அனைவரும் தெரிந்ததே. அதுமட்டுமின்றி மே 1 ஆம் தேதி தல அஜீத்தின் பிறந்த நாள். அஜீத்தின் பிறந்த நாளுக்கு ரஜினி தரும் பரிசாகவே 'கபாலி' படத்தின் வெளியீடு என்று கருதப்படுகிறது.

இதுகுறித்த அதிகாரபூர்வ அறிவிப்பு தாணு தரப்பில் இருந்து விரைவில் வெளிவரும் என கூறப்படுகிறது.